У Польшчы легалізуюць 8 тысяч беларускіх трактароў
Як паведамляюць польскія СМІ, у Еўрасаюзе плануюць урэгуляваць прававы статус каля 8 тысяч трактароў Мінскага трактарнага завода (МТЗ), якія былі завезеныя ў Польшчу пасля 2016 года, піша выданне «Белорусы и рынок».
Здымак ілюстрацыйны. Фота: Lookby.media
Праблема заключалася ў тым, што гэтая тэхніка не мела поўнага пакета еўрапейскіх дазволаў і фармальна не адпавядала частцы патрабаванняў ЕС. З-за гэтага трактары не маглі паўнавартасна праходзіць тэхагляд і легальна выкарыстоўвацца на дарогах агульнага карыстання.
Цяпер Еўракамісія дала згоду на ўвядзенне спецыяльных правіл, якія дазволяць урэгуляваць статус гэтай тэхнікі. Польскі ўрад падрыхтаваў адпаведныя нормы, якія павінны быць разгледжаныя ў маі на ўзроўні ўрадавага камітэта.
Фактычна гаворка ідзе пра «амністыю» для гэтай тэхнікі: пасля праверак трактары змогуць атрымліваць спецыяльную адзнаку на станцыях тэхагляду і афіцыйна выкарыстоўвацца фермерамі як на палях, так і на дарогах агульнага карыстання.
Улады Польшчы падкрэсліваюць, што мэта рашэння — дазволіць фермерам бяспечна і без абмежаванняў выкарыстоўваць у сельскагаспадарчай працы ужо набытыя машыны, а не купляць новыя.
Чытайце таксама:
Купля трактароў з Беларусі прынесла праблемы польскім фермерам
МТЗ пачаў вырабляць па 90 супертрактароў за месяц
У Польшчы катастрофа: не ведаюць, куды падзець бульбу. Цэны ўпалі да смешнага