З 1 ліпеня будуць новыя патрабаванні да арэнднага жылля

У Беларусі з 1 ліпеня пачнуць дзейнічаць новыя патрабаванні да тыпавых спажывецкіх якасцяў жылля. Змены тычацца найперш арэнднага жылля і павінны павысіць яго камфортнасць для жыхароў, паведамляе тэлеканал СТБ.

Здымак ілюстрацыйны. Фота: «Наша Ніва»

Паводле новых правіл, у кожнай новай арэнднай кватэры абавязкова павінны быць мэбля і базавая бытавая тэхніка. У пералік уваходзяць халадзільнік з маразільнай камерай, пральная машына і мікрахвалевая печ. Пры гэтым тэхніка павінна быць беларускай вытворчасці.

Таксама новыя нормы закранаюць аздабленне кватэр. Ванныя пакоі і туалеты павінны быць цалкам абкладзеныя пліткай. У жылых пакоях прадугледжваецца кладка ламінату або паркетнай дошкі, а сцены павінны быць або пафарбаваныя, або абклееныя шпалерамі.

Асобна ў дакуменце прапісалі і максімальны кошт тэхнікі:

• халадзільнік — не даражэйшы за 30 базавых велічынь;
• пральная машына — да 25 базавых;
• мікрахвалевая печ — да 9 базавых велічынь.

У Міністэрстве архітэктуры і будаўніцтва адзначаюць, што галоўная мэта новаўвядзенняў — зрабіць арэнднае жыллё больш зручным для жыцця, каб людзі маглі адразу заязджаць у кватэру пасля атрымання ключоў.

Акрамя таго, улады разлічваюць, што новыя патрабаванні падтрымаюць беларускіх вытворцаў мэблі, бытавой тэхнікі і будаўнічых матэрыялаў.

Каментары да артыкула