Стварылі дзяржаўную камісію для перапісвання падручнікаў па гуманітарных прадметах

У Беларусі ствараюць дзяржаўную камісію па падрыхтоўцы падручнікаў і навучальных дапаможнікаў у гуманітарнай і грамадазнаўчай сферы. Адпаведнае распараджэнне падпісаў Аляксандр Лукашэнка.

Здымак ілюстрацыйны. Скрыншот з відэа

Паведамляецца, што новую камісію ўзначаліць міністр адукацыі Андрэй Іванец. У яе склад увойдуць навукоўцы, выкладчыкі, школьныя настаўнікі-практыкі, прадстаўнікі дзяржаўных органаў, дэпутаты і грамадскія дзеячы. Больш падрабязна персанальны склад пакуль не раскрываецца.

Асноўнай задачай камісіі стане «забеспячэнне паступальнага абнаўлення падручнікаў і вучэбных дапаможнікаў на аснове адзіных канцэптуальных падыходаў да такой літаратуры на ўсіх узроўнях адукацыі ў адпаведнасці з дзяржаўнымі інтарэсамі».

Міністэрству адукацыі даручана арганізацыйна і метадычна забяспечваць дзейнасць камісіі, а таксама займацца «паляпшэннем» зместу падручнікаў і дапаможнікаў у найбліжэйшыя пяць гадоў.

Каментары да артыкула