«Дзеці пілі той самы напой». Бацькі з іншых гарадоў пра атручэнне дашкольнікаў у Барысаве

У сераду і чацвер нарабіла розгаласу сітуацыя ў Барысаве, дзе былі шпіталізаваныя тры дзясяткі гадаванцаў дзіцячых садкоў з атручэннем. У сацыяльных сетках бацькі распавядаюць пра выпадкі і ў іншых гарадах, піша Onliner.by.

Следчы камітэт завёў крымінальную справу па факце масавага атручэння дзяцей паводле ч. 1 арт. 336 («Парушэнне санітарных нормаў і правілаў, гігіенічных нарматываў, што па неасцярожнасці пацягнула захворванне або атручванне людзей»). Акрамя таго, у Следчым камітэце паведамілі яшчэ пра 13 пацярпелых у розных населеных пунктах Мінскай вобласці. Расследаванне працягваецца.

Ва УУС Мінскага аблвыканкама заявілі, што супрацоўнікі падраздзяленняў па барацьбе з эканамічнымі злачынствамі разам са следчымі высвятляюць усе абставіны здарэння. Рэалізацыя прадукцыі, якая магла стаць крыніцай інцыдэнту, прыпынена ва ўсіх рэгіёнах краіны.

Большасць дзяцей ужо выпісана з бальніцы і пераведзена на амбулаторнае лячэнне.

З журналістамі Onliner.by звязаўся Аляксандр — мужчына, які з сям’ёй жыве ў Мінскім раёне. Падзея, якая адбылася ў Барысаве, распавёў ён, вельмі падобная на тое, што здарылася ў дзіцячым садку, куды ходзіць яго дзіця.

— У аўторак мая дачка спакойна пайшла ў садок. А пятай гадзіне яе забралі, а прыкладна а шостай — пачатку сёмай яе пачало ванітаваць. За вечар гэта паўтарылася 20 разоў. У 21:30 я прыехаў з работы, на машыне мы паехалі ў бальніцу. Жонка ўзяла з сабой тазік — дачку ванітавала нават у дарозе.

Калі мы прыехалі ў бальніцу, у прыёмным пакоі сказалі, што з Мінскага раёна мы не першыя. Суседзі пісалі ў агульных чатах, што ў іхняга сына, які ходзіць у старшую групу, пачалося тое ж самае. Проста жахліва, мы перажылі жудасную сітуацыю.

Цяпер дзяўчынка разам з мамай знаходзіцца ў бальніцы, ёй спатрэбіліся кропельніцы. Дыягназ, па словах бацькі, звязаны з атручэннем. Пры гэтым мужчына падкрэслівае, што гаворка не пра адзіночны выпадак: у адной палаце з яго блізкімі знаходзяцца дзеці з таго ж садка і нават групы. Аляксандру вядома пра чатырох шпіталізаваных дзяцей і яшчэ трох, хто лечыцца дома.

Па інфармацыі Аляксандра, у бацькоўскім чаце ў якасці магчымай прычыны недамагання дзяцей называюць пэўны кісламалочны напой. Журналісты звязаліся з загадчыцай дзіцячага садка, аднак там ад каментароў адмовіліся.

Тым часам падобнымі гісторыямі дзеляцца бацькі ў сацыяльных сетках. У многіх паведамленнях аўтары пішуць, што іхнія дзеці пілі той самы напой, пра які распавёў Аляксандр.

У чацвер з журналістамі звязаліся некалькі маці і падзяліліся тым, што здарылася з іх дзецьмі. Дзіця Алены мае 4,5 года, сям’я жыве ў Салігорску.

— Я мама аднаго з дзяцей, якое 02.06.2026 звярталася за дапамогай у прыёмны пакой дзіцячай бальніцы Салігорска ў сувязі з ванітамі. Яны пачаліся а 19:00, праз дзве гадзіны пасля таго, як я забрала дзіця са садка.

А 21:00 прыехалі ў прыёмны пакой, там ужо была чарга дзяцей дашкольнага ўзросту. Пакуль чакалі ў чарзе, усіх ванітавала. Мы чакалі доктара дакладна 1,5 гадзіны.

Да дактароў пытанняў няма, дзяцей было шмат, таму прыйшлося чакаць. Пры нас дзяцей клалі ў інфекцыйнае аддзяленне, нам таксама рэкамендавалі, але я напісала адмову. У меню на падвячорак быў [напой] — дзіця кажа, што пілі яго ў той дзень (я пыталася і ў дзень, калі стала дрэнна, і на наступны дзень перапытвала), — распавяла жанчына.

Яшчэ адна маці таксама з Салігорска — яе дзіця мае пяць гадоў, яно наведвае адзін з садкоў горада.

— [Напой] у той дзень давалі ўсім дзецям у дзіцячых садках. У майго дзіцяці 2 чэрвеня было ванітаванне. Звярнуліся ў прыёмны пакой. Там знаходзілася 12 дзяцей, 7 з іх адразу шпіталізавалі з сімптомамі атручэння. Мы напісалі адмову ад шпіталізацыі. За ноч стан палепшыўся, учора яшчэ было дома, сёння пайшло ў садок.

У чатах Салігорска вялікая колькасць маці пісала пра ванітаванне ў дзяцей. Кажуць, што атруціліся [напоем], — напісала салігарчанка.

Кацярына — шматдзетная маці. Сям’я жыве ў Любанскім раёне.

— Сітуацыя такая: мы забралі траіх дзяцей з садка, вярнуліся дадому прыкладна а 17:30. Адразу ж вырвала сына — я падумала, што гэта магло здарыцца з-за скачкоў на батуце, потым пачало ванітаваць дачку, а пасля — абодвух разам. З шостай да восьмай вечара я думала, што, можа, ім палягчэе, давала лекі — але гэта не дапамагала. Адзінае, што прыйшло ў галаву, — паехаць у прыёмны пакой. Пакуль чакалі, машыны хуткай дапамогі прыязджалі адна за адной: адно дзіця перадавалі дактарам, а ім ужо тэлефанавалі з паведамленнямі пра іншых дзяцей з такімі ж сімптомамі — гэты наплыў працягваўся да апоўначы. Потым бацькі ўжо самі прывозілі дзяцей — у той вечар іх паступіла вельмі шмат.

Мне казалі пра вірус, але ж у той дзень мае дзеці кантактавалі з іншымі — тады і яны павінны былі б заразіцца. Аднак такіх сімптомаў у іх няма. Да таго ж я ведаю, што такое ратавірус, — неаднаразова з ім сутыкалася. Як мінімум павінна быць тэмпература, а тут было толькі ванітаванне — настолькі моцнае, што сын апошні раз нават збялеў.

Але самае цікавае тое, што ўжо раніцай сімптомаў не было, дзеці былі цалкам здаровыя. Я напісала ў бацькоўскі чат — у дзвюх групах у дзяцей назіралася тое самае. Мне адказалі як мінімум тры маці. Сёння [у чацвер] нас ужо выпісалі.

Загадчыца садка сказала, што прычынай стаў [напой], бо нічога іншага быць не можа. Я паведаміла пра гэта ў санітарную службу, але там адказалі, што гэтая інфармацыя пакуль не пацверджана.

Журналісты звязаліся з вытворцам названага напою і папрасілі пракаментаваць сітуацыю. Аднак аператыўна атрымаць адказ не ўдалося.

Тым часам у Следчым камітэце пацвердзілі: на гэты момант гаворка ідзе толькі пра выпадкі ў Мінскай вобласці. Па факце здарэння ўжо заведзена крымінальная справа.

— Крымінальная справа дае больш магчымасцей для ўстанаўлення ўсіх абставін здарэння, у тым ліку для правядзення следчых дзеянняў. Яна заведзена з той прычыны, што следчымі сапраўды выяўлены парушэнні, якія прывялі да гэтых наступстваў.

У чацвер удзень міліцыя Мінскай вобласці паведамляла пра прыпыненне па ўсёй краіне рэалізацыі прадукцыі, якая магла стаць першакрыніцай сітуацыі. Аднак канкрэтны вытворца або брэнд у афіцыйных крыніцах не ўзгадваліся.

Каментары да артыкула