Загінуў калмыцкі Герой Расіі, які летась праславіўся, дакладваючы Пуціну пра поспехі
Падчас баявых дзеянняў ва Украіне загінуў старшы лейтэнант Наран Ачыр-Гараеў, які камандаваў штурмавой ротай. Пра гэта паведаміў кіраўнік Калмыкіі Бату Хасікаў. Загінулы за ранейшы ўдзел у расійскай агрэсіі атрымаў званне Героя Расіі.
Наран Ачыр-Гараеў
Шырокую вядомасць Наран Ачыр-Гараеў атрымаў пасля ўдзелу ў прамой лініі з Уладзімірам Пуціным у снежні 2025 года. Там ён расказваў пра ўдзел свайго падраздзялення ў баях за Северск у Данецкай вобласці. Паводле інфармацыі расійскага боку, ягоная рота нібыта заняла больш за 80 жылых дамоў і знішчыла дзясяткі ўмацаваных пазіцый украінскіх войскаў.
За гэтыя дзеянні ў 2025 годзе Ачыр-Гараеву далі званне Героя Расійскай Федэрацыі. Узнагароду — медаль «Залатая Зорка» — яму 17 снежня 2025 года ўручыў асабіста Пуцін. 9 мая 2026 года Ачыр-Гараеў прысутнічаў на парадзе ў Маскве, дзе сярод іншага вітаўся з Пуціным.
Наран Ачыр-Гараеў вітаецца з Пуціным на парадзе ў Маскве 9 мая 2026 года
Наран Ачыр-Гараеў быў родам з горада Лагань у Калмыкіі. Сваю службу падчас вайны з Украінай ён пачынаў як кіроўца, а пазней стаў камандзірам штурмавой роты. Абставіны яго гібелі пакуль не раскрываюцца.
Чытайце таксама:
Брытанская разведка: На вайне ва Украіне загінулі амаль паўмільёна расійскіх салдат
На вайне ва Украіне загінуў мінскі амапавец, які збіваў беларусаў
Кіраўнік НАТА звярнуўся да расійскіх мужчын з жорсткім папярэджаннем