«Вельмі цікавыя заявы саюзніка Пуціна». Кіраўнік МЗС Германіі адрэагаваў на заявы Лукашэнкі пра вайну ва Украіне
Міністр замежных спраў Ёган Вадэфуль мяркуе, што ўжо ўлетку можа з’явіцца магчымасць пачаць перамовы аб спыненні вайны Расіі супраць Украіны, піша Радыё Свабода.
Фота: Michael Kappeler/picture alliance via Getty Images
«Цяпер ёсць шанец, мяркую, ужо гэтым летам пачаць перамовы», — сказаў Ёган Вадэфуль у інтэрв’ю медыягрупе RTL.
Паводле яго, прэзідэнт Расіі Уладзімір Пуцін можа быць больш адкрытым да дыялогу, чым раней. «Магчыма, ён цяпер знаходзіцца на такім этапе, калі сур’ёзна задумваецца», — не выключыў нямецкі міністр.
У гэтым кантэксце Ёган Вадэфуль згадаў заяву Аляксандра Лукашэнкі, якую той зрабіў у інтэрв’ю тэлеканалу Al Arabiya English, — «ні Расія, ні Украіна не могуць перамагчы ў вайне ваенным шляхам».
«Гэта цікавая заява вельмі блізкага саюзніка Пуціна», — адзначыў ён.
Кіраўнік МЗС дадаў, што «Украіна ўвесь гэты час была гатовая да перамоў» і што цяпер «Уладзімір Пуцін павінен вырашыць — ці хоча ён весці перамовы, ці далей ваяваць».
Ёган Вадэфуль нагадаў, што Нямеччына разам з Францыяй і Вялікабрытаніяй таксама гатовыя ўдзельнічаць у перамовах аб завяршэнні вайны ва Украіне.
Чытайце таксама:
Лукашэнка папрасіў прабачэння ў Зяленскага