У Расіі прадаюць «беларускае» марозіва. Але беларусу дастаткова глянуць на ўпакоўку ФОТАФАКТ
Адзін з карыстальнікаў Threads выклаў у сацсетцы фота тавару, які прадаецца ў Расіі пад выглядам беларускага. Але беларусу для таго, каб зразумець увядзенне ў зман, дастаткова кінуць вока на назву брэнда.
Падаваная як беларускамоўная назва марозіва, заўважанага на прылаўках адной з крам Санкт-Пецябурга, — «Алесіны сказкі». Азнаямленне з інфармацыяй пра вытворцу пацвярджае сумневы — прадукт насамрэч выраблены ў расійскім горадзе Цвер.
Сам аўтар падпісаў свой допіс «Шцірліц яшчэ ніколі не быў такі блізкі да правалу», а беларусы ў каментарах спаборнічаюць у з'едлівасці:
«Так, тут ужо па пярэднім боку зразумела, што не наша…»
«Дастаткова «Сказак». Рэквізіты вытворцы ўжо можна не чытаць».
«Тлушчы вавёркі».
«Нешта гэтая Алеся брэша».
«Ну пасля V i Z… літара І не здзівіць…»
«Як яны не здольныя хаця б у Гугле праверыць мову, то якая там якасць вытворчасці?!»
«А потым будуць пісаць: «Беларусы, чаму ваша марозіва такое нясмачнае?»