Японія развітваецца з гальштукамі

У Японіі ўпершыню за 80 гадоў гальштукі больш не будуць улічвацца пры разліку інфляцыі. Дзяржаўныя статыстыкі вырашылі, што яны ўжо не адлюстроўваюць паўсядзённых выдаткаў большасці японцаў. Што яшчэ выключылі са спажывецкага кошыка і якія новыя тавары занялі іх месца, паведамляе Financial Times.

Ілюстрацыйны здымак. Фота: Panchita Chotthanawarapong / Vecteezy.com

Раз на пяць гадоў Бюро статыстыкі Японіі пераглядае так званы спажывецкі кошык — пералік тавараў і паслуг, на аснове якога разлічваецца індэкс спажывецкіх цэн. Пасля чарговага абнаўлення, якое ўступіць у сілу з наступнага месяца, упершыню з 1948 года ў ім не будзе гальштукаў.

Гальштук — не адзіная ахвяра гэтай гістарычнай «чысткі». Разам з імі са спісу выключылі і жаночыя панчохі ды калготкі, якія доўгі час былі неад'емнай часткай офіснага дрэс-кода.

Гэта першы перагляд спажывецкага кошыка пасля пандэміі COVID-19, якая прынесла ў японскія кампаніі дыстанцыйную працу, анлайн-сустрэчы і іншыя новыя практыкі. Як паказаў час, гэтыя змены аказаліся больш устойлівымі, чым чакалася. Вяртання да строгіх офісных правіл не адбылося, а традыцыйны касцюм японскага офіснага супрацоўніка ўсё часцей саступае месца футболкам і штанам-чынасам.

Аднак, як адзначаюць эксперты, гэты працэс пачаўся яшчэ задоўга да пандэміі. Прадстаўнікі галіны звязваюць яго з дзяржаўнай праграмай Cool Biz, уведзенай ў 2005 годзе. Яна заклікала супрацоўнікаў у летні перыяд адмаўляцца ад гальштукаў і пінжакоў, каб менш карыстацца кандыцыянерамі і эканоміць электраэнергію.

Паводле аднаго з ветэранаў японскай вытворчасці гальштукаў, менавіта пасля запуску гэтай праграмы ў грамадстве замацавалася ўяўленне, што насіць гальштук ужо не прынята. Ён адзначыў, што аб'ёмы вытворчасці на яго фабрыцы скараціліся амаль на 90%.

Гэтую тэндэнцыю пацвярджае і статыстыка. Такійская асацыяцыя вытворцаў гальштукаў паведамляе, што іх вытворчасць і імпарт скараціліся прыкладна да 11 мільёнаў штук — гэта толькі траціна ад узроўню 2009 года.

Падобная сітуацыя склалася і з жаночымі панчохамі. Паводле Японскай асацыяцыі вытворцаў шкарпэткавых вырабаў, з 2016 года іх гадавыя пастаўкі ўпалі больш як удвая — да 125 мільёнаў пар. Для параўнання, у канцы 1980‑х штогод прадавалася больш за мільярд пар.

Адмова японскіх офісаў ад гальштукаў і калготак супала з імклівым ростам папулярнасці японскага брэнда паўсядзённага адзення Uniqlo. За апошнія 30 гадоў гэтая марка заняла 12,5% усяго ўнутранага рынку адзення.

На вызваленае ў спажывецкім кошыку месца прыходзяць тавары, якія адлюстроўваюць новыя прыярытэты маладзейшага пакалення. Адным з самых прыкметных дапаўненняў стаў пратэінавы парашок.

Сучасныя японцы значна больш за сваіх бацькоў заклапочаныя фізічнай формай і нарошчваннем мышачнай масы. Продажы бялковых дабавак, батончыкаў і напояў імкліва растуць, ператвараючыся з нішавага прадукту для бодзібілдараў у элемент штодзённага рацыёну звычайнага гараджаніна.

Акрамя пратэінавага парашку, у спіс упершыню трапілі страхаванне хатніх жывёл, ананасы і веласіпедныя шлемы. Апошнія — у сувязі з прыняццем новых нормаў, накіраваных на павышэнне бяспекі дарожнага руху.

Нягледзячы на змяншэнне попыту, прадстаўнікі галіны не лічаць, што гальштук цалкам знікне. На іх думку, сёння ён ужо менш успрымаецца як модны аксэсуар і ўсё больш асацыюецца з афіцыйнымі мерапрыемствамі, дзелавым этыкетам і сітуацыямі, калі трэба падкрэсліць сур'ёзнасць і павагу да абставін.

Каментары да артыкула