Прэзідэнтку Славеніі западозрылі ў сувязях з расійскай разведкай

Парламенцкі камітэт Славеніі па пытаннях бяспекі запатрабаваў ад разведвальнай службы SOVA тэрміновую інфармацыю пра магчымыя сувязі прэзідэнткі краіны Наташы Пірц-Мусар з расійскімі спецслужбамі. Пасяджэнне з прадстаўнікамі разведкі плануюць правесці на наступным тыдні, піша The Moscow Times.

Наташа Пірц-Мусар. Фота: AP Photo/Kirsty Wigglesworth

Падставай для праверкі сталі публікацыі пра даўнюю сяброўку прэзідэнткі Вікторыю Крывалуцкую — грамадзянку Славеніі расійскага паходжання. Як высветлілася, раней яна мела рамантычныя адносіны з Раманам Еглічам, былым супрацоўнікам славенскай разведкі, які ў сярэдзіне 1990‑х гадоў збег у Расію.

Дэпутат ад кіроўнай правацэнтрысцкай Славенскай дэмакратычнай партыі Жан Махніч заклікаў урад спыніць перадачу Пірц-Мусар разведвальнай інфармацыі і матэрыялаў, звязаных з пытаннямі бяспекі. Ён заявіў, што асцерагаецца магчымых сувязяў прэзідэнткі з расійскай шпіёнскай сеткай.

Офіс Пірц-Мусар катэгарычна адхіліў падазрэнні ў яе сувязях з расійскімі спецслужбамі.

Цікавасць да гэтай гісторыі ўзнікла пасля аварыі з удзелам аўтамабіля прэзідэнткі. У канцы ліпеня Пірц-Мусар была шпіталізаваная з пераломам ключыцы. Крывалуцкая ў момант аварыі таксама знаходзілася ў машыне.

Славенскія СМІ раней паведамілі пра цесныя сувязі Крывалуцкай з Раманам Еглічам. Яна пацвердзіла, што яны былі ў рамантычных адносінах і некалькі гадоў жылі разам у Расіі. Паводле яе слоў, сувязь з былым разведчыкам яна не падтрымлівае ўжо больш за 15 гадоў.

Каментары да артыкула