КДБ затрымаў групу людзей, якіх вінавацяць у зборы закрытай інфармацыі пра абаронныя прадпрыемствы

Камітэт дзяржаўнай бяспекі Беларусі паведаміў пра спыненне дзейнасці групы грамадзян краіны, якіх падазраюць у зборы закрытых звестак аб прадпрыемствах абароннага комплексу ў інтарэсах замежнага куратара.

Здымак ілюстрацыйны. Фота: Lookby.media

Паводле інфармацыі КДБ, падазраваныя збіралі даныя пра вытворчыя магутнасці, перамяшчэнне асобных відаў прадукцыі і супрацоўнікаў прадпрыемстваў. Для перадачы сабранай інфармацыі яны нібыта выкарыстоўвалі спецыяльна створаныя каналы сувязі.

Як паведамляе прэс-служба КДБ, у выніку аператыўных мерапрыемстваў удзельнікаў групы затрымалі. У іх канфіскавалі сродкі сувязі, электронныя носьбіты інфармацыі і грошы, атрыманыя за выкананне даручэнняў.

Па гэтым факце распачалі крымінальную справу. Следчыя, як паведамляецца, высвятляюць усе абставіны здарэння і магчымыя сувязі затрыманых.

Колькасць затрыманых і іх імёны пакуль што не называюцца. 

Каментары да артыкула