Асуджанага за генацыд Ратку Младзіча з размахам пахавалі ў Сербіі
У Сербіі з вайсковымі ўшанаваннямі пахавалі Ратку Младзіча — былога камандуючага арміяй Рэспублікі Сербскай, якога міжнародны суд у Гаазе прысудзіў да пажыццёвага зняволення за генацыд, ваенныя злачынствы і злачынствы супраць чалавечнасці падчас вайны ў Босніі і Герцагавіне, піша Бі-бі-сі.
Фота: AP Photo
Тысячы прыхільнікаў Младзіча прайшлі маршам да могілак Топчыдэр у Бялградзе пасля паніхіды ў царкве. Многія прыехалі арганізавана з Рэспублікі Сербскай (частка Босніі і Герцагавіны) і розных гарадоў Сербіі. Для іх Младзіч быў не ваенным злачынцам, а «героем, які абараняў сербскі народ».
Цела Младзіча даставілі з Гаагі, дзе 84‑гадовы генерал памёр у турэмнай бальніцы. Пасля прыбыцця труну прынялі сербскія вайскоўцы і накрылі сцягамі Сербіі і Рэспублікі Сербскай. Па дарозе да медыцынскай акадэміі і пазней да царквы людзі сустракалі картэж з плакатамі ў падтрымку Младзіча, а некаторыя паліцыянты і вайскоўцы аддавалі яму вайсковае прывітанне.
На развітанні прысутнічалі высокапастаўленыя сербскія чыноўнікі, прадстаўнікі Рэспублікі Сербскай, сын прэзідэнта Сербіі, а таксама пасол Расіі. Пахавальную службу ўзначаліў патрыярх Сербскай праваслаўнай царквы Парфірый, Младзіч быў названы праваслаўным хрысціянінам і сербскім салдатам.
Ратка Младзіч, вядомы пад мянушкай «баснійскі мяснік», быў асуджаны за генацыд у Срэбраніцы, ваенныя злачынствы і злачынствы супраць чалавечнасці. Ягоныя войскі былі датычныя да масавых забойстваў і этнічных чыстак, ахвярамі якіх сталі дзясяткі тысяч чалавек.
Пахаванне выклікала рэзкую крытыку з боку сем'яў ахвяр. Арганізацыя «Маці Срэбраніцы» заявіла, што ўшанаванне асуджанага за генацыд з'яўляецца ганьбай. Некаторыя амерыканскія палітыкі таксама заклікалі Сербію і Рэспубліку Сербскую не дапускаць афіцыйнага ўслаўлення Младзіча.
Па словах праваабаронцаў, такія ўрачыстасці не спрыяюць прымірэнню на Балканах, бо замест памяці пра ахвяр у цэнтры ўвагі зноў аказваецца ваенны злачынца. Яны лічаць, што гэта таксама сведчыць пра захаванне ў Сербіі палітыкі адмаўлення і змяншэння значнасці злачынстваў, за якія Младзіч быў асуджаны.
Чытайце таксама:
Цела Раткі Младзіча прывезлі ў Сербію ўрадавым самалётам
У Гаазе памёр былы вайсковы кіраўнік баснійскіх сербаў Ратка Младзіч
Улады Рэспублікі Сербскай хочуць перайменаваць Срэбраніцу, каб пазбегнуць напаміну пра генацыд