Расійскіх агентаў з тэлеграм-канала «Рыбарь» заўважылі за правядзеннем здымак у Еўропе. Пасля выкрыцця яны ўцяклі

Супрацоўнікі канала «Рыбарь», які звязваюць з расійскімі спецслужбамі, праводзяць здымкі ў краінах Еўрасаюза, выкарыстоўваючы для гэтага розныя спосабы, каб не раскрываць сапраўдную мэту сваёй дзейнасці. Гэта раскрыла чэшскае выданне Seznam Zprávy.

Карэспандэнт Віталь Чашчухін (у шэрай куртцы) і аператар Ігар Далматаў непасрэдна перад тым, як уцякуць ад пытанняў чэшскіх журналістаў

Канал звязаны з былым супрацоўнікам прэс-службы Міністэрства абароны Расіі Міхаілам Звінчуком, вядомым пад псеўданімам «Рыбарь».

Чэшскія журналісты здолелі выкрыць людзей, якія працуюць са Звінчуком. Яны пераканалі іх, што могуць арганізаваць інтэрв’ю з экспертам па пытаннях медыяпісьменнасці і дэзынфармацыі Богумілам Картаўсам. Раней Картаўс атрымаў запрашэнне на такую размову. У ім гаварылася, што расійскі аналітычны цэнтр «Рыбарь» рыхтуе дакументальны серыял пра сучасную сацыяльна-палітычную і эканамічную сітуацыю ў Еўропе.

Матэрыял чэшскіх расследавальнікаў пераказвае расійскі незалежны тэлеграм-канал Astra.

Эксперту паведамілі, што здымкі праводзяцца не толькі ў Чэхіі, але таксама ў Францыі, Бельгіі, Аўстрыі, Венгрыі, Славакіі, Сербіі, Босніі і Герцагавіне. Перад інтэрв’ю Картаўс атрымаў спіс пытанняў. У прыватнасці, яго збіраліся распытаць пра рост падтрымкі правых і еўраскептычных сіл у Чэхіі, а таксама пра магчымасць нармалізацыі адносін з Расіяй.

Паводле інфармацыі чэшскіх журналістаў, запыт на інтэрв’ю паходзіў ад расіяніна Барыса Дворкіна. Яго называюць рэжысёрам дакументальнага кіно, які супрацоўнічае з фондам «Гісторыя Айчыны». Гэтым фондам кіруе кіраўнік Службы замежнай разведкі Расіі Сяргей Нарышкін.

На сустрэчу з журналістамі прыехалі карэспандэнт Віталь Чашчухін і аператар Ігар Далматаў. Чэшскія журналісты здолелі іх ідэнтыфікаваць па відэазапісе сустрэчы. Паводле Seznam Zprávy, абодва маюць дакументы, якія дазваляюць жыць у Еўрасаюзе. Чашчухін раней працаваў з расійскімі тэлеканаламі «Известия», «Пятый канал» і РЕН ТВ.

Калі ўдзельнікі здымак зразумелі, што сустрэча была арганізаваная журналістамі, якія расследавалі іх дзейнасць, яны паспешліва пакінулі месца.

Паводле інфармацыі чэшскага выдання, прадстаўнікі расійскай прапаганды таксама спрабавалі атрымаць інтэрв’ю ў дэпутата Еўрапарламента Івана Давіда, чэшскага эксперта па пытаннях энергетыкі Уладзіміра Штэпана, былога кіраўніка вайсковай разведкі Чэхіі Андара Шандара і славацкага публіцыста Сама Марэца.

Пры гэтым за парушэнне санкцый, уведзеных супраць Міхаіла Звінчука і «Рыбаря», удзельнікам здымак у Чэхіі можа пагражаць да васьмі гадоў пазбаўлення волі.

Сёлета ў ліпені Вялікабрытанія ўвяла санкцыі супраць кіраўніцтва і супрацоўнікаў Z-канала «Рыбарь», звязанага з Міністэрствам абароны Расіі. У лютым ChatGPT заблакаваў сетку, звязаную з гэтым каналам. Яе аўтары выкарыстоўвалі штучны інтэлект для распаўсюджвання крамлёўскіх наратываў на міжнародную аўдыторыю. Восенню 2024 года ўлады ЗША абвясцілі ўзнагароду да 10 мільёнаў даляраў за інфармацыю пра Telegram-канал «Рыбарь».

Каментары да артыкула