У Мінску не збіраюцца ўводзіць плату за ўезд у цэнтр горада

У Мінску не плануюць уводзіць платны ўезд у цэнтр горада. Пра гэта заявіў старшыня Мінгарвыканкама Уладзімір Кухараў, піша агенцтва «Мінск-Навіны».

Здымак ілюстрацыйны. Фота: «Наша Ніва»

Паводле слоў чыноўніка, у цэнтральнай частцы сталіцы актыўна развіваецца сістэма платных парковак. У межах першага і другога гарадскіх кольцаў ужо абсталявана каля 10 тысяч платных парковачных месцаў. З часам іх колькасць будзе павялічвацца.

З невялікімі выключэннямі плата за паркоўку спаганяецца ў працоўныя дні ў дзённы час. Гэта дазваляе жыхарам навакольных дамоў бясплатна пакідаць свае аўтамабілі на гэтых месцах, калі яны вяртаюцца з працы.

Кухараў адзначыў, што людзі, якія прыязджаюць у цэнтр сталіцы па справах, могуць самі выбіраць, як ім дабірацца: аплаціць паркоўку або скарыстацца грамадскім транспартам.

Раней кіраўнік Мінгарвыканкама паведамляў, што ў Мінску на паркінгах і стаянках ёсць больш за 20 тысяч свабодных месцаў.

Каментары да артыкула