У Бярозаўскім раёне мужчына прайграваў у казіно нават дапамогі на выхаванне дзіцяці

Азартны гулец за тры месяцы зрабіў 2550 ставак.

Здымак ілюстрацыйны. Фота: magnific.com

Мужчына не дапамагаў сям’і фінансава, хоць ягоная жонка знаходзіцца ў дэкрэтным адпачынку з маленькім дзіцём. Ён не аплачваў камунальныя паслугі і не купляў прадукты, адзенне ды іншыя неабходныя рэчы.

Жанчына расказала, што захапленне мужа азартнымі гульнямі паставіла сям’ю ў цяжкае фінансавае становішча. Праверка пацвердзіла, што мужчына рэгулярна наведваў гульнявыя ўстановы і прайграваў там значныя сумы.

Маці мужчыны паведаміла, што сын прайграў дапамогу пры нараджэнні першага дзіцяці, выплату за пастаноўку жонкі на ўлік да 12‑га тыдня цяжарнасці, а таксама адну штомесячную дапамогу па доглядзе дзіцяці да трох гадоў. Пра гэта яна даведалася ад нявесткі.

З ліпеня па верасень 2026 года мужчына зрабіў 2550 ставак.

Пракурор Бярозаўскага раёна звярнуўся ў суд з патрабаваннем забараніць яму наведваць звычайныя і віртуальныя гульнявыя ўстановы і ўдзельнічаць у азартных гульнях. Суд задаволіў гэтае патрабаванне і ўвёў забарону тэрмінам на тры гады.

Каментары да артыкула