Łatuška patłumačyŭ, čamu apazicyja padpisała pratakoł ab lidarstvie Cichanoŭskaj

Siabra Abjadnanaha pierachodnaha kabinieta Biełarusi Pavieł Łatuška adreahavaŭ na abvinavačańni, što demakratyčnyja siły Biełarusi, pryznaŭšy na kanfierencyi «Novaja Biełaruś» Śviatłanu Cichanoŭskuju nacyjanalnaj lidarkaj da praviadzieńnia svabodnych i sumlennych vybaraŭ u Biełarusi ci jaje asabistaha rašeńnia skłaści ź siabie hetyja paŭnamoctvy, nibyta «pabudavali dyktaturu».

Pavieł Łatuška

Pavieł Łatuška adznačyŭ jak charakterny fakt, što na hetuju navinu ŭ abvinavaŭčym styli «adnymi ź pieršych adreahavali top-prapahandysty režymu i niekatoryja «niezaležnyja rasijskija ŚMI», nakštałt Sota». A dalej tłumačyć, što demakratyčnyja siły nasamreč pabudavali i navošta. I ci sapraŭdy ŭsio tak strašna, jak heta padajuć.

Pa-pieršaje, i «dyktatura», i «manarchija», śćviardžaje Łatuška, praduhledžvajuć vałodańnie realnaj uładaj, čaho ŭ biełaruskich demakratyčnych siłaŭ vidavočna niama ani blizka.

A tamu heta historyja nie pra ŭładu ŭ demsiłach, a historyja baraćby z režymam Łukašenki.

Dla hetaj ža baraćby, padkreślivaje palityk, patrebnaja sistemnaja alternatyva i lehitymnaje lidarstva, jakoje Łatuška znoŭ taki zaklikaje nie błytać z realnaj uładaj. Nieabchodnaść ža najaŭnaści hetaha lidarstva źviazanaja ŭ tym liku ź mižnarodnaj padtrymkaj i ŭzroŭniem reprezientacyi biełarusaŭ dy łabiravańnia padtrymki ich baraćby na mižnarodnaj arenie.

«Dyk voś čym vyšejšy naš uzrovień — tym vyšejšaja hetaja padtrymka. Admaŭlajemsia ad hetaha, admaŭlajemsia ad subjektnaści — i tady režym Łukašenki stanovicca biezalternatyŭnym varyjantam, pryznavać pačynajuć jaho», — śćviardžaje Łatuška.

Łukašenka akurat i prahnie pazbavicca ad alternatyvy, a tamu heta toje, čaho demakratyčnyja siły nie mohuć dapuścić, kali chočuć jaho pieramahčy.

Prymajučy rašeńnie ab padpisańni pratakoła, było ŭśviedamleńnie, što heta budzie ŭspryniata nieadnaznačna, ale jość taksama i razumieńnie, što pytańnie «kadencyi» Cichanoŭskaj budzie klučavym punktam ataki prapahandy i łabistaŭ režymu dla likvidacyi stvoranaj demsiłami sistemy instytutaŭ. Mienavita tamu demakratyčnyja siły i pajšli na padpisańnie pratakoła mienavita ŭ takim nie vielmi papularnym vyhladzie,

«bo zachavańnie i ŭmacavańnie alternatyvy režymu, jaje subjektnaści dla nas važniej zarablańnia miedyjnych ačkoŭ. Režym Łukašenki pavinien zrazumieć, što my nikudy nie dzieniemsia, alternatyva jaho režymu nikudy nie dzieniecca i nie samaraspuścicca, pakul jon isnuje. A svabodnyja i sumlennyja vybary — nie syduć z paradku dnia i nikudy nie padzienucca sa śpisu našych patrabavańniaŭ. I staronka nie budzie pierahornutaja, pakul hetyja patrabavańni nie buduć vykananyja».

Pieramovy ž z režymam mohuć, jak śćviardžaje Łatuška, adbycca na ŭmovach vyzvaleńnia ŭsich palitviaźniaŭ, spynieńnia represij i publičnaj zajavy Łukašenki ab tym, što jon nie idzie na vybary i pakidaje pasadu kiraŭnika UNS.

«U hetym vypadku my taksama hatovyja spynić svaju palityčnuju dziejnaść za miažoj i viarnucca da jaje ŭžo ŭ ramkach svabodnaha, sumlennaha demakratyčnaha pracesu ŭnutry krainy, u Biełarusi», — padsumoŭvaje palityk.

Kamientary da artykuła