«Čamu nie spytaje ŭ siabie: kali ja jezdžu ŭ Hiermaniju i zabiraju ŭsie ŭznaharody, čamu nie vyjšaŭ na kantakt ź niemcami?» Da kaho źviarnuŭsia Łatuška?
Padčas dyskusii na kanfierencyi «Novaja Biełaruś» kiraŭnik Narodnaha antykryzisnaha ŭpraŭleńnia Pavieł Łatuška vystaviŭ sustrečnyja pretenzii tym, chto aburajecca, što biełaruskija palitviaźni nie ŭvajšli ŭ abmien pamiž Rasijaj, Hiermanijaj i ZŠA. Z kantekstu vynikaje, što Łatuška źviartaŭsia da Taćciany Chomič, siastry Maryi Kaleśnikavaj.
Žurnalistka Taćciana Karaviankova spytała ŭ Łatuški, čamu stratehija apazicyi «nastolki pravalnaja», što Hiermanija, addajučy kilera Krasikava, navat nie ŭzhadała pra Maryju Kaleśnikavu, jakaja žyła ŭ Hiermanii 12 hadoŭ.
«Mnie vielmi balić, što ŭ hetym abmienie niama biełaruskich palitviaźniaŭ. Ale hetaksama balić i palakam. Čamu byŭ vydadzieny Pabła Hansales — Pavieł Rubcoŭ, ahient rasijskaj SVR, jaki dziejničaŭ pad prykryćciom ispanskaha žurnalista na terytoryi Polščy? Jon byŭ vydadzieny polskimi ŭładami, i polskija ŭłady nie zmahli dabicca vyzvaleńnia Andžeja Pačobuta. Takoje ž pytańnie možna adrasavać amierykanskamu ŭradu. Čamu hramadzianin ZŠA i Biełarusi Juraś Ziańkovič, jaki znachodzicca ŭ turmie, nie byŭ vydadzieny ŭ ramkach hetaha abmienu? Tamu što havorka išła pra abmien pamiž supracoŭnikami śpiecsłužb. U hety śpis byli dadatkova ŭklučanyja šerah palityčnych dziejačaŭ Rasii. Bolš nichto nie ŭklučaŭsia, heta byli absalutna sakretnyja zakrytyja pieramovy.
Mnie balić. Ale heta pavinna baleć usim tym, chto tak časta jeździć u Hiermaniju. Chto znachodzicca ŭ hetaj Hiermanii bolš, čym Pavieł Łatuška va ŭsich zamiežnych kamandziroŭkach. I toj čałaviek, jaki zaraz mianie čuje i razumieje, pra kaho ja kažu. Čamu hety čałaviek krytykuje zaraz nas, a nie spytaje ŭ siabie: kali ja jezdžu ŭ Hiermaniju i zabiraju ŭsie ŭznaharody, katoryja naležać nie mnie, čamu ja nie vyjšaŭ na hety kantakt? Čamu niemcy nie pastavili pytańnie biełaruskich palitviaźniaŭ?»
Karespandent «NN» udakładniła ŭ Łatuški paśla jaho vystupu, kaho kankretna jon mieŭ na ŭvazie. Jon skazaŭ, što nie budzie nazyvać imia.
Z vysokaj dolaj dakładnaści možna mierkavać, što Pavieł Łatuška apielavaŭ da Taćciany Chomič, siastry Maryi Kaleśnikavaj. Jana atrymlivała premii za palitźniavolenuju siastru, u tym liku ŭ Hiermanii.
«Ja zadajusia pytańniem, čamu ŭ śpisie vyzvalenych niama nobieleŭskaha łaŭreata 2022 hoda Alesia Bialackaha, jaki ŭžo 3 hady ŭ turmie. Čamu niama Maryi Kaleśnikavaj — i mnohich inšych palitźniavolenych.
Z majho hledzišča, adna z pryčynaŭ adsutnaści biełarusaŭ u abmienie — heta toje, što tak i nie atrymałasia pryjarytyzavać pytańnie palitźniavolenych dla zachodnich partnioraŭ.
Kamunikacyja z pasyłami «nie handlu palitviaźniami», «nijakich pieramovaŭ z režymam», «spačatku vyzvaleńnie ŭsich — potym pieramovy i novyja vybary» — nie pryviała da patrebnaha vyniku», — dniami vykazałasia Taćciana Chomič.
Ciapier čytajuć
Jak skłaŭsia los internacyjanalnych dziaciej, jakich vychoŭvali ŭ Žodzinie ŭ pieršym u Biełarusi dziciačym domie siamiejnaha typu?5
Kamientary