«Katastrofa ŭ Siryi nabiraje abaroty». Rasijskija vajenkary i ekśpierty ŭ šoku ad imklivaha padzieńnia haradoŭ

«Pryjdziecca zadumacca pra evakuacyju baz».

Na adnoj z vulic Chamy. Fota: Kasim Rammah/Anadolu via Getty Images

Ź Siryi praciahvajuć prychodzić sumnyja dla Rasii naviny. Siońnia siryjskaja armija pakinuła horad Chama, jaki za 13 hadoŭ kanfliktu ni razu nie byŭ pad kantrolem paŭstancaŭ.

Ekśpierty ličać, što zdača Chamy moža mieć ciažkija nastupstvy, pakolki stavić pad pramuju pahrozu inšy horad — Choms.

Jak piša «Vojennyj ośviedomitiel», u vypadku zachopu Chomsa paŭstancam adkryjecca daroha nie tolki na poŭdzień da stalicy Siryi Damaska, ale i zručny šlach na zachad da ŭźbiarežža, dzie raźmiaščajucca klučavyja rasijskija vajskovyja abjekty — baza VMF u Tartusie, da jakoj budzie kala 80 kiłamietraŭ, i dalej za im aeradrom Chmiejmim u Łatakii.

«Takim čynam, kali džychadysty ŭstalujuć kantrol i nad Chomsam, to heta samo pa sabie nie tolki adreža ŭźbiarežža i rasijskija bazy na im ad staličnaha rehijonu, ale i ŭzdymie pytańnie pra nieabchodnaść ich evakuacyi.

A nastupnaje prasoŭvańnie džychadystaŭ u bok Damaska pastavić pytańnie ŭžo pra isnavańnie sajuznaj nam siryjskaj dziaržavy, jakoj my jaje viedajem apošnija niekalki hadoŭ», —

zaŭvažaje «Vojennyj ośviedomitiel» i nazyvaje situacyju «blizkaj da krytyčnaj».

Pra toje, što «ryzyki dla rasijskich baz u Siryi pavialičvajucca», u kamientaryi rasijskamu vydańniu «Vzhlad» havoryć vajskovy ekśpiert Juryj Lamin. Jak jon tłumačyć, paŭstancy vychodziać na tyja rubiažy, ź jakich zručna zapuskać drony-kamikadze pa prybiarežnych haradach, dzie znachodziacca bazy. Padobnyja napady byli i raniej, ale ciapier paŭstancy mohuć ich rabić čaściej i našmat maštabniej.

Siryjskija paŭstancy pazirujuć na borcie zachoplenaj bronietechniki na ŭskrainie horada Chama. 3 śniežnia 2024 hoda. Fota: AP Photo/Ghaith Alsayed

«Zachop Chomsa moža pryvieści da raspadu krainy», —

prahnazuje Lamin i tłumačyć, što harady Chama i Choms — heta taja voś, na jakoj trymajucca suviazi pamiž roznymi častkami Siryi. Kali paŭstancy prasunucca dalej, to ŭźniknie pahroza taho, što ŭźbiarežža budzie adrezana ad astatniaj častki krainy.

«Situacyja ŭžo raźvivajecca pa vielmi drennym scenaryi, i kali bajevikoŭ nie strymać — tady mahčymy katastrafičny scenaryj: bajeviki mohuć pajści častkova na Damask, častkova na ŭźbiarežža», — adznačyŭ ekśpiert.

Pra toje, što «staŭki pavyšajucca» i «katastrofa ŭ Siryi nabiraje abaroty», piša vajenkar Alaksandr Koc. «Kali siryjcy zdaduć hetaksama lohka i Choms, daviadziecca zadumacca pra evakuacyju baz», — zaŭvažaje vajenkar.

Pa jaho słovach, «pakidańnie Chamy ilustruje ŭsiu hłybiniu dehradacyi siryjskaj siłavoj mašyny».

«Nie dumaju, što turki i brytancy raźličvali na taki ahłušalny pośpiech. Chutčej za ŭsio, płanavali stvaryć dla nas punkt napružanaści, na jaki my adciahniem častku svaich resursaŭ. Ale ciapier pahroza našym bazam u Tartusie i Chmiejmimie stanovicca nie iluzornaj», — zaŭvažaje vajenkar.

Pa słovach Koca, paśla takich pośpiechaŭ žadańnia dapamahčy paŭstancam, jakich jon nazyvaje «barmalejami», «šmat u kaho dadasca».

«Dziela taho, kab vykinuć nas ź Blizkaha Uschodu, ciapier šmat chto moža zapluščyć vočy na toje, što Chajat Tachryr aš-Šam — pravapierajemnica Al Kaidy», — aburajecca vajenkar.

«U pravincyi Chama situacyja dasiahnuła katastrafičnaha punktu», — panikuje «Rybaŕ».

Pa jaho słovach, «jašče troški, i bajeviki zmohuć vyjści da avijabazy T4 uzdoŭž šašy numar 40». Uličvajučy jaje važnaść dla prairanskich hrupovak, jakija na avijabazie raźmiaščajuć svaje bieśpiłotniki, «Rybaŕ» nazyvaje situacyju «zasmučalnaj» i dadaje, što jana «paharšajecca imkliva».

Pa słovach aŭtara kanała, biez padtrymki rasijskaj avijacyi i śpiecyjalistaŭ adkat Siryjskaj arabskaj armii budzie praciahvacca i dalej. «Pierśpiektyŭ dla vyratavańnia situacyi nie toje što niama. Ale varyjantaŭ vielmi mała, i heta fakt», — ličyć «Rybaŕ».

Jak piša «Hłobalistika», padzieńnie Chamy moža aznačać kaniec dla siryjskaj dziaržavy ŭ tym vyhladzie, u jakim jana isnavała. Aproč terytaryjalnych strat, jakija rušać uśled, heta surjozny maralny ŭdar pa ŭradzie.

Aŭtar kanała adznačaje, što paŭstancy paśla Chamy mohuć pajści ŭ niekalkich napramkach. Pa jaho słovach, «najbolš vierahodnym padajecca Choms, a taksama Łatakija dla adrazańnia rasijskaj bazy».

Partret prezidenta Siryi Bašara Asada i vyjava dziaržaŭnaha ściaha Siryi ŭ śmietnicy na terytoryi Akademii VPS u pryharadzie Alepa, zachoplenaj paŭstancami. 3 śniežnia 2024 hoda. Fota: Rami Alsayed/NurPhoto via Getty Images

«Z ulikam taho, što siryjcy admovilisia vykarystoŭvać pieravahi haradskoj zabudovy ŭ Chamie, vielmi mała vierycca ŭ pośpiech u Chomsie, ale nadzieja ŭsio jašče jość. U Łatakii ŭsio składaniej praz horny reljef», — piša «Hłobalistika» i dadaje:

«Kali bajeviki zmohuć dabracca da važnych ściežak, to situacyja stanie fatalnaj. (…) Urad Bašara Asada praspaŭ vajnu, i situacyja stanovicca ŭsio bolš krytyčnaj».

Kamientary da artykuła