«Situacyja blizkaja da katastrofy», a «taki moh być zimovy kurort!». Rasijskija vajenkary pra nastup paŭstancaŭ u Siryi
Antyŭradavyja hrupoŭki, za jakimi stajać Turcyja i niekatoryja arabskija krainy, uvajšli ŭ najbolšy horad Siryi — Alepa. Rasijskija vajenkary šukajuć vinavatych, dajuć parady i robiać prahnozy.
Jak paviedamlajecca, z pačatku nastupu pad kantrolem paŭstancaŭ apynulisia 920 kvadratnych kiłamietraŭ terytoryi Siryi. Rasijskija vajenkary šukajuć tłumačeńni takoha raźvićcia padziej i dajuć prahnozy.
Chto vinavaty?
Telehram-kanał «Russkij inžienier» «šmat u čym» bačyć zasłuhu samoha Asada.
Jak jon tłumačyć, ułady Siryi nie stvaryli ŭmoŭ dla prytoku rasijskich inviestycyj, jakija b dali impuls ekanomicy.
Pavodle jahonaha mierkavańnia, rasijski biznes nie zmoh zamacavacca ŭ krainie z-za taho, što «inviestaraŭ rabavali, dušyli ŭschodniaj vytančanaściu, nie dajučy raźvicca. Prosta dušyli prajekty na stadyi inviestavańnia, prosta z prahnaści i žudasnaha bardaku ŭ kiravańni krainaj».
Pry spryjalnym inviestycyjnym klimacie, ličyć aŭtar, rasijanie b mieli «biaśpiečnyja kurorty dla zimovaha adpačynku, pad achovaj našych vajskovych baz, dajučy pry hetym miascovamu narodu mahčymaść zarablać i žyć pa-ludsku, nie ŭ halečy».
Adnak «Muchabarat [śpiecsłužba Siryi, anałah biełaruskaha KDB i HUBAZiKa] i čynoŭniki prosta zakansiervavali haleču». U spałučeńni z «biespriediełom» u adnosinach da miascovaha nasielnictva, heta zachavała padtrymku apazicyi siarod nasielnictva navat paśla jaje razhromu».
Aŭtar telehram-kanała «Rybaŕ» taksama zaŭvažaje, što «situacyja ŭ Siryi ŭskładniajecca pavodzinami samich siryjcaŭ».
«Absalutna spraviadlivyja vykazvańni pra toje, što ćviet nacyi byŭ stračany ŭ pieršyja hady vajny, jakaja pačałasia ŭ 2011 hodzie. Voś tolki toje, što zastałosia, źjeli karupcyja, niepatyzm, ekanamičny chaos i niežadańnie ničoha mianiać».
Telehram-kanał «Hłobalistika» dadaje, što praŭładnyja ŚMI Siryi ciapier abvinavačvajuć va ŭsim Rasiju. Da hetaha hučała krytyka, što rasijanie ŭ Siryi ničoha nie robiać dla taho, kab adbivać udary pa krainie z boku Izraila.
Aŭtar telehram-kanała chvalujecca, što ŭ vyniku, akramia mahčymaj tatalnaj destabilizacyi ŭ Siryi, Rasija atrymaje jašče bolšy niehatyŭ na svoj adras. Heta ŭ vyniku «kančatkova padarvie pazicyi našaj krainy ŭ krainie, jakuju ŭ svoj čas vyratavali ad krachu».
Što rabić?
Vajenkar Juryj Padalaka ŭ svaim kanale piša: «Dla ŭsich zrazumieła, što ŭ Siryi ŭ nas nie prosta bujny kryzis, a pastupova idzie da katastrofy». Tamu patrebnyja «niestandartnyja i chutkija rašeńni».
«Tak, Alepa ŭžo nie vyratavać, ale Siryju jašče vyratavać možna», — piša vajenkar i prapanuje nakiravać u krainu, dzie padraździaleńni Uzbrojenych sił Rasii razam z uradavymi vojskami zmahajucca z paŭstancami, «kadravaje padmacavańnie z mocnych hienierałaŭ».
Siarod mahčymych kandydatur vajenkar nazyvaje hienierała Ivana Papova, jaki kaliści dva hady ŭžo pravioŭ u Siryi. U mai hetaha hoda Papoŭ byŭ źniaty z pasady kamandujučaha 58-j armijaj pa abvinavačańni ŭ bujnym kradziažy.
Telehram-kanał «Rybaŕ», u svaju čarhu, aburajecca z taho faktu, što «va ŭmovach frontu, jaki ruchajecca ŭ Alepa, baraćbity infarmacyjnaha frontu Siryi, vychavanyja ŭ najlepšych tradycyjach rasijskaha vajennaha infazmahańnia časoŭ da SVA, apublikavali, jak hienierał-pałkoŭnik Alaksandr Čajka, jaki prybyŭ u Siryju, uskłaŭ kvietki».
Publikacyja takoha pasta ŭ ciapierašnich umovach, na pohlad aŭtara kanała, «vyhladaje jak zły ździek».
«A potym ruskija dypłamaty i vajskoŭcy dziviacca, adkul ža takoje niehatyŭnaje staŭleńnie da ruskich vajskoŭcaŭ siarod siryjcaŭ biarecca», — zaŭvažaje «Rybaŕ».
«Biełaruski siłavik», u svaju čarhu, pra hety fakt źjedliva dadaje: «Vyhladaje heta ŭsio jak mahčymaść pryjechać i ŭskłaści kvietački na mahiłu linii abarony ŭ Alepa».
Što budzie dalej?
Prahnazujučy dalejšaje raźvićcio padziej, «Rybaŕ» piša pra mahčymaść adnaŭleńnia hłabalnaha kanfliktu, kali da paŭstancaŭ dałučacca bujnyja plamiony poŭdnia krainy i bajeviki tak zvanaj «Isłamskaj dziaržavy»:
«Siryju mohuć paprostu ŭziać i raździalić na častki, viarnuŭšy horšy scenaryj dziesiacihadovaj daŭniny. Ciapierašniaje padzieńnie Alepa, jaki vystajaŭ tady, — heta pramoje nastupstva niavyrašanaści siryjskaha kanfliktu tady, kali heta było treba zrabić».
U svaich analizach situacyi ŭ Siryi rasijskija vajenkary pravodziać paraleli z płanami zaklučeńnia pieramirja z Ukrainaj.
Tak «Russkij inžienier» zaŭvažaje: «Turcyja i jaje kuratary z kanjunkturnych mierkavańniaŭ zaraz zrabili vializnuju padstavu dla Vašynhtona, bo nahladna pakazali našaj «partyi pieramirja ŭ abmien na admienu sankcyj», toje, što nas čakaje paśla takoha pieramirja».
«Heta vielmi składany ŭrok, jaki nieabchodna zasvoić usim ludziam, jakija ličać, što Minsk-3 moža być mahčymy», — piša «Rybaŕ».
Alepa za try dni? Siryjskija paŭstancy ŭvajšli ŭ najbolšy horad Siryi. Erdahan iznoŭ usadziŭ jatahan u śpinu Pucina
Rasijskija vajenkary pišuć pra «krach abarony» rasijska-siryjskich siłaŭ pad Alepa. Asad śpiešna vylecieŭ u Maskvu
Siryjskija paŭstancy pierajšli ŭ nastup pad Alepa, siarod zahinułych mohuć być vahnieraŭcy
Kamientary
Słovno Biełaruś i Rośsiju opisyvajet.