Partyja, ad jakoj u KR išło najbolš ahientury, zajaviła pra niepryznańnie Cichanoŭskaj. A paśla asprečyła heta

Na vybarach za jaje prahałasavała 1,55% čałaviek.

Ahientka z šerahaŭ «Narodnaj Hramady» Volha Ciškievič padčas intervju dla ANT. Skrynšot ź videa

Partyja Narodnaja Hramada vydała zajavu ab niepryznańni Śviatłany Cichanoŭskaj jak nacyjanalnaha lidara Biełarusi. Maŭlaŭ, «za čas jaje znachodžańnia ŭ jakaści lidara demakratyčnych sił jana nie zmahła damahčysia značnych vynikaŭ, adpaviednych čakańniam hramadzian».

Prytym zajava, jak śćviardžajecca, była nie prosta apublikavanaja ŭ telehram-kanale arhanizacyi, ale i pieradadziena ŭ Siejm Litvy.

U zajavie Narodnaja Hramada nastojvaje na «nieabchodnaści praviadzieńnia novych demakratyčnych vybaraŭ i vypracoŭki efiektyŭnaj stratehii dla vychadu ź isnujučaha kryzisu» i zaklikaje ŭsie palityčnyja siły «abjadnacca dziela pošuku rašeńniaŭ, jakija viernuć davier prostych biełarusaŭ».

Narodnaja Hramada paźniej asprečyła, što pieradavała ŭ litoŭski Siejm list ab niepryznańni Cichanoŭskaj. «Tanny ŭbros», — napisała ŭ zajavie partyja.

Pry hetym varta adznačyć, što sama hetaja arhanizacyja zusim nie moža pachvalicca choć by samym minimalnym davieram z boku biełaruskaha hramadstva. Na vybarach u Kaardynacyjnuju radu ŭ traŭni minułaha hoda błok «Salidarnaść», u jaki ŭvachodziła «Narodnaja Hramada», nabraŭ usiaho 104 hałasy ŭ svaju padtrymku (1,55% ad kolkaści tych, chto ŭziaŭ udzieł u hałasavańni) i staŭ adnym z troch udzielnikaŭ tych vybaraŭ, jakija nie pieraadoleli nievysokaha barjeru ŭ 3%, adpaviedna nie atrymaŭšy ŭ hetym orhanie pradstaŭnictva. Upłyvy ž samoj «Narodnaj Hramady» jašče mienšyja, pakolki ŭ tym błoku jany byli abjadnanyja ź inšaj marhinalnaj partyjnaj hrupoŭkaj — častkaj chryścijanskich demakrataŭ na čale z Hieorhijem Dźmitrukom. Apošniaja, darečy, taksama raniej sprabavała adprečvać paŭnamoctvy Cichanoŭskaj.

Bolš taho — pierad vybarami ŭ Kaardynacyjnuju radu «Narodnaja hramada» apynułasia ŭ centry skandału, pakolki akazałasia, što ŭ bazie danosaŭ, zdabytaj «Kibierpartyzanami» z uzłamanaha sajta KDB, byli dva zvaroty ad ludziej z hetaj arhanizacyi: Pavieł Bialucin napisaŭ danos na Mikałaja Aŭtuchoviča, a Volha Ciškievič — na Eduarda Palčysa. Prytym aboje byli ŭžo na emihracyi i źbiralisia bałatavacca ŭ Kaardynacyjnuju radu. Adrazu paśla raskryćcia abodvuch sa śpisaŭ vyklučyli, ale imidž arhanizacyi heta, jak vyhladaje, nie palepšyła. 

Volha Ciškievič nieŭzabavie paśla taho viarnułasia ŭ Biełaruś i dała intervju prapahandystam z ANT. U im jana raskazvała pra Kaardynacyjnuju radu, palitviaźniaŭ, hrošy ŭ partyi i drony, jakimi nibyta źbiralisia ŭdaryć pa Biełarusi.

Kamientary da artykuła