Što za «Sihma boj»? Hetaj virusnaj pieśniaj zaniepakoilisia ŭ Jeŭraparłamiencie
Pieśnia, jakuju vykonvajuć dźvie rasijskija školnicy, zapałaniła internet. A pra kaho ŭ joj śpiavajecca?
Vykanaŭcy pieśni «Sihma boj» Śviatłana Čarciščava (źleva) i Maryja Jankoŭskaja. Skryn videa: betsyofficial / YouTube
Rasijskaja pieśnia «Sihma boj» vyjšła ŭ kastryčniku minułaha hoda i ŭžo praź miesiac dziakujučy tyktoku stała viadomaja va ŭsim śviecie.
Pieśniu vykonvajuć dźvie rasijskija błohierki — 11-hadovaja Śviatłana Čarciščava, viadomaja jak Betsy, i 12-hadovaja Maryja Jankoŭskaja, jakaja taksama źjaŭlajecca viadoŭcaj rasijskaha dziciačaha telekanała CTC Kids.
Aŭtarami hetaj virusnaj pieśni stali rasijski rok-śpiavak MUKKA, a taksama baćka Betsy — rasijski kampazitar i muzyčny pradziusar Michaił Čarciščaŭ, jaki napisaŭ muzyku i pieśni da šerahu papularnych rasijskich animacyjnych filmaŭ dla dziaciej.
U novaj pieśni dziaŭčaty śpiavajuć pra niejkaha sihma boja, jaki kružyć hałovy ŭsim navokał, ale dabicca jaho ŭvahi amal niemahčyma.
Termin «sihma» jak charaktarystyka mužčyn nie vydumka aŭtaraŭ pieśni. Hetym paniaćciem piśmieńnik Teador Bił dapoŭniŭ najaŭnuju ijerarchiju «sacyjalnych archietypaŭ».
Siońnia «sihma boj» (anh. — sigma male) papularny termin u internet-kultury, asabliva na forumach i ŭ sacyjalnych sietkach. Tak nazyvajuć mužčynu, jaki nibyta addaje pieravahu być niezaležnym ad sacyjalnych struktur i čakańniaŭ.
Jon nie imkniecca da lidarstva, jak «alfa», i nie padparadkoŭvajecca, jak «beta», a dziejničaje samastojna, pa-za tradycyjnaj sacyjalnaj ijerarchijaj. Jamu prypisvajuć takija rysy, jak samadastatkovaść, intraviertnaść, niestandartny padychod. Jon pryvablivaje svajoj upeŭnienaściu i niezaležnaściu.
Jaskravymi prykładami mužčyn typu «sihma» nazyvajuć takich piersanažaŭ, jak Patryk Biejtman u filmie «Amierykanski psichapat» u vykanańni Kryścijana Bejła ci Tajler Dziorden z «Bajcoŭskaha kłuba» ŭ vykanańni Breda Pita. Siarod litaraturnych hierojaŭ minułaha heta Hryhoryj Piačoryn i Šerłak Chołms.
U sučasnym hramadstvie sihma boj staŭ simvałam novaj fiłasofii, jakaja zaklikaje być saboju, a nie imknucca za natoŭpam.
Na siońnia pieśnia «Sihma boj» u vykanańni rasijskich dziaŭčynak na YouTube nabrała zvyš 60 miljonaŭ prahladaŭ, patrapiła ŭ čarty Spotify, Shazam, iTunes. U siaredzinie studzienia jana ŭvajšła ŭ top-10 čarta Billboard u katehoryi Hot Dance / Pop Songs (tancavalnyja / pop-pieśni). Siarod jaje susiedziaŭ — treki Bili Ajliš, Aryjany Hrande, Charli XCX i inšych suśvietnych zorak.
Prypieŭ pieśni staŭ hukam dla rolikaŭ u tyktoku i instahramie, pad trek stali tancavać viadomyja influjensiery. Pieśniu stali pierajnačvać i vykarystoŭvać u humarystyčnych rolikach.
A błohier Sucharaŭski Siohun — japoniec, jaki pryjazdžaŭ pažyć u Minsku i vučyŭ biełaruskuju, — raskazvaŭ pra sihmaruskuju movu. Składana zrazumieć da kanca jaho kancepcyju, ale ŭ hetaj movie dadajuć bonusy za vykarystańnie biełaruskich słoŭ.
U toj ža čas pieśnia vyklikała niehatyŭnuju reakcyju niekatorych jeŭrapiejskich palitykaŭ. Jeŭradeputatka ad Hiermanii, pradstaŭnica sacyjalna-libieralnaj partyi Volt Neła Ryl pryviała «Sihma boj» u jakaści prykładu taho, jak Rasija praz kulturu nasadžaje svoj śvietapohlad.
Palityk vykazała mierkavańnie, što pieśnia «pieradaje patryjarchalnyja i prarasijskija pohlady na śviet», i zaklikała Jeŭrasajuz «spynić navat hetyja tonkija praniknieńni i falsifikacyi» z boku Rasii.
Čytajcie taksama:
Uładalnik hrodzienskaha stryp-kłuba vypuściŭ klip na pieśniu pra sajuz Biełarusi i Rasii
Vy nie pavierycie, kim akazaŭsia «vypadkovy» bajanist na vakzale, jaki śpiavaŭ pra Łukašenku
U polskim finale adboru na «Jeŭrabačańnie» prahučyć pieśnia na padlaskaj havorcy