Vy nie pavierycie, kim akazaŭsia «vypadkovy» bajanist na vakzale, jaki śpiavaŭ pra Łukašenku
Čyrvaniejučy ad starannaści, bajanist hraŭ na čyhunačnym vakzale ŭ Minsku pieśniu-ahitku «Baćka ŭ nas kruty». Heta byŭ nie prosta vuličny muzyka, a ažno kiraŭnik «Alfa Radyjo» Vadzim Šepiet.
Kab imitavać narodnuju luboŭ i padtrymku Łukašenki, prapahanda ładzić fłešmoby ŭ šmatludnych miescach. Niadaŭna, naprykład, akupavali čyhunačny vakzał u Minsku. Pakul zvyčajnyja ludzi z torbami dy čamadanami śpiašalisia na ciahnik, niekalki dziasiatkaŭ vajskoŭcaŭ dy štatnych aktyvistaŭ niaśmieła śpiavali odu Łukašenku.
Niejki entuzijazm imknuŭsia prademanstravać, mabyć, tolki bajanist — jon ža kiraŭnik «Alfa Radyjo» Vadzim Šepiet. Što ž heta za čałaviek?
Naradziŭsia Vadzim u vioscy Rusinavičy Lachavickaha rajona Bresckaj vobłaści, u škołu chadziŭ u Lachavičach. Jaho znajomyja zhadvajuć, što ŭ 10 kłasie Vadzim razam ź niekatorymi adnakłaśnikami sprabavaŭ navat stvaryć supołku «Maładoha Frontu». Ale niejak nie skłałasia.
Paśla škoły chłopiec pastupiŭ u Baranavickaje muzyčnaje vučylišča. Paźniej u adnym ź intervju Vadzim pryznavaŭsia, što pajšoŭ tudy, kab paradavać baćku. Toj ličyŭ, što syn-muzyka budzie dobra zarablać.
Atrymaŭšy dypłom, Vadzim staŭ pracavać vykładčykam pa kłasie bajana ŭ muzyčnaj škole. Ale entuzijazmu jaho chapiła litaralna na try dni — jon vielmi chutka zrazumieŭ, što vučyć hamam dziaciej nie choča.
Vyrašyŭ skaryć stalicu i pastupiŭ u Biełdziaržuniviersitet kultury ŭ Minsku na estradny vakał. Praz hod kinuŭ — pa aficyjnaj viersii, vučycca jamu było niecikava.
Ale viartacca na małuju Radzimu nie vielmi chaciełasia. Kab zarabić na žyćcio ŭ Minsku, uładkavaŭsia ŭ restaran śpiavać i vieści viečary, a paralelna padzarablaŭ na viasiellach. U restaranie ž paznajomiŭsia z budučaj žonkaj, jakaja pracavała tam kasirkaj. U šlubie naradziłasia troje synoŭ. Šmatdzietnaja siamja atrymała lhotny kredyt i pabudavała kvateru.
Małady chłopiec tym časam pravodziŭ mierapryjemstvy dy śpiavaŭ «chity 80-ch».
U 2012 hodzie Vadzim vyrašyŭ usio ž atrymać vyšejšuju adukacyju — pajšoŭ u pryvatny Instytut kiravańnia i pradprymalnictva na śpiecyjalnaść ekanamist-mieniedžara.
Pryčynaj, što jaho karjera tamady skončyłasia, Vadzim ličyć moładź, jakaja ŭ niejki momant stała admaŭlacca ad šumnych zastollaŭ z karavajami i svatami.
— Na žal, ich paśla razvału SSSR stała aktyŭna vyciaśniać zachodniaja moda, hety praces praciahvajecca i ciapier. Arka z kvietačkami la mora, na krajniak — la Minskaha, z paračkaj siabroŭ, šviedski stoł z šampusikam i kanapie… Takija viasielli tranślujucca jak modnyja, stylnyja.
Šepiet pracavaŭ na roznych radyjostancyjach, byŭ viadučym «Supierłato».
U 2018 hodzie Vadzim pastupiŭ na płatnuju zavočku fakulteta padrychtoŭki i pierapadrychtoŭki Instytuta dziaržaŭnaj słužby Akademii kiravańnia. Śpiecyjalnaść abraŭ «Kiravańnie dziaržaŭnymi infarmacyjnymi resursami». Praz hod pajšoŭ tudy ž na jašče adnu pierapadrychtoŭku pa śpiecyjalnaści «Dziełavy etykiet, pratakoł i technałohii vystupleńnia».
Da pandemii paśpieŭ papracavać u kancertnym ahienctvie Atom Entertainment Group, ale ŭ razhar kavidu pierajšoŭ na «Alfa Radyjo».
Kali b nie 2020 hod, Vadzim, mahčyma, i pa siońnia vioŭ muzyčnyja chit-parady. Ale ž dziakujučy tamu, što jon tady zmoh prademanstravać luboŭ da dziejučaha režymu, Vadzim pieraskočyŭ sa svajoj pasady na miesca kiraŭnika «Alfa Radyjo».
Na novaj pasadzie mužčyna pačaŭ adpracoŭvać akazany davier i zapuściŭ hramadska-palityčnaje šou «Budni»:
— Ja pryjšoŭ na «Alfa Radyjo» ŭ vieraśni 2020 hoda, kali nie prosta vyśpieła palityčnaja tema, a ŭ joj była vostraja nieabchodnaść. Upieršyniu my sutyknulisia ź situacyjaj, što sprabavali złamać krainu, razvalić dziaržavu i pasiejać chaos. Mnie samomu było cikava razabracca va ŭsim, što adbyvajecca ŭ Biełarusi i za jaje miežami, dałučyć da hetaj spravy viadučych ekśpiertaŭ. Kali b ja pačaŭ vieści takija prahramy ŭ inšy čas (naprykład, da 2020-ha), nie dumaju, što ich by chtości słuchaŭ. Raniej my žyli ŭ niejkim ciapličnym śviecie. Tak što palityčnaja tematyka — indykatar prafiesijnaj i sacyjalnaj stałaści. Kožnaja prahrama patrabuje surjoznaj padrychtoŭki.
Šepet saryjentavaŭsia, što treba rabić, kab atrymlivać hanarary za sumnieŭnaj jakaści tvorčaść. Naprykład, u 2021 hodzie Šepiet napisaŭ i sam praśpiavaŭ prapahandysckuju pieśniu, pryśviečanuju novastvoranamu śviatu Dzień narodnaha adzinstva.
Z nazvaj asabliva nie mudravaŭ — «Ty jedinstvom silna, moja Biełaruś!». Dy i z tekstam nie zamaročvaŭsia: «Vnov́ kružit vorońjo nieustanno, vsio pytajaś tiebia razdieliť».
Biełarusy ž u pieśni pradstaŭleny «małymi dziećmi», jakim Biełaruś dała mahčymaść žyć razam. Sam aŭtar prosić krainu «zachavać svajo sapraŭdnaje abličča». Klip pad heta zrabili taki ž pasredny: malaŭničyja krajavidy źmianiajucca videa z praŭładnych aŭtaprabiehaŭ.
Darečy, tym, što dapamahaje abjadnoŭvać biełarusaŭ, Vadzim ličyć sankcyi.
— A pa-sapraŭdnamu adzinyja my staniem tady, kali naša moładź pierastanie hladzieć u bok Zachadu, adzinyja my budziem, kali pačniom jašče bolš šanavać i pavažać svaju krainu i, niahledziačy na lubuju niezadavolenaść u asobnych pytańniach, adstojvać pazicyju dziaržavy. Pryčym usiudy: u pobycie, u kramie, u luboj hutarcy z haściami z-za miažy…
Dziŭna, kaniešnie, jak chutka Vadzim zabyŭsia, što nie tak daŭno sam vielmi radavaŭsia mahčymaści źjeździć u Vilniu. A ź jakoj asałodaj jon paziravaŭ u litoŭskaj kramie z butelkaj zamiežnaha ałkaholu…
Heta nie adziny fokus pamiaci Šepieta. Jon lubić publična krytykavać kaleh, jakija pryncypova zvolnilisia ŭ 2020 hodzie. A kaliści hanaryŭsia sełfi ź Dzianisam Dudzinskim i nazyvaŭ jaho prafiesijanałam.
Apošnija hady Vadzim aktyŭna ŭdzielničaje va ŭsich mierapryjemstvach, kab čarhovy raz paćvierdzić svaju addanaść. Hatovy i drovy na łukašenkaŭskim čempijanacie kałoć, i na čyhunačnym vakzale pad bajan śpiavać. Jeździć i pa tak zvanych «Marafonach adzinstva»: dzieści maderataram hutarki pabudzie, a dzieści i samomu dazvolać raspavieści prostym ludziam, jak u Biełarusi žyć dobra.
Chto taja prafsajuznaja aktyvistka z MAZa, jakaja paprasiła Łukašenku razabracca ŭ jutubie z «biehłymi»?
Jak 2020 hod pałamaŭ žyćcio Aleha Hajdukieviča. Ni siamji, ni palityčnych pierśpiektyŭ, i tolki toj u ruce
Chto toj hubazikaviec, jaki, mierkavana, źbivaŭ palitźniavolenuju Kaciarynu Novikavu paśla zatrymańnia
Zahadvała finansami pry Dzieviatoŭskim, lubić hłamur. Što za dziaŭčyna stała novym tvaram HUBAZiKa?
«My jamu daviarajem». Čamu źnikłuju Mielnikavu zamianiŭ mienavita eks-vajskoviec Paciechin?1
Kamientary