Paśla vybaraŭ Vialikabrytanija i Kanada pašyryli svaje sankcyi suprać režymu Łukašenki

Vialikabrytanija abjaviła ab uviadzieńni sankcyj suprać 9 fizičnych i jurydyčnych asob u Biełarusi, dziejničajučy ŭ kaardynacyi z Kanadaj. Pra heta paviedamili na sajcie ŭrada Vialikabrytanii. Taksama zajavu ab uviadzieńni novych sankcyj zrabiŭ kanadski ŭrad.

«Sankcyi nakiravanyja suprać kiraŭnikoŭ ustanoŭ, adkaznych za surjoznyja parušeńni pravoŭ čałavieka, i kampanij abaronnaha siektara Biełarusi, jakija padtrymlivajuć vajnu Rasii va Ukrainie», — havorycca ŭ paviedamleńni ŭrada Vialikabrytanii.

Siońniašnija sankcyi zakranajuć nastupnych asob:

• Ihar Karpienka — staršynia Centralnaj vybarčaj kamisii Biełarusi;
• Viktar Dubroŭka — načalnik kałonii №11 u Vaŭkavysku;
• Pavieł Kazakoŭ — načalnik turmy №1 u Hrodnie;
• Andrej Cedryk — načalnik SIZA №1 u Minsku;
• Andrej Ananienka — kiraŭnik HUBAZiKa;
• Michaił Biedunkievič — namieśnik kiraŭnika HUBAZiKa.

Taksama ŭ sankcyjny śpis uklučanyja try arhanizacyi abaronnaha siektara Biełarusi:

• AAT «ALEŬKURP» / ALEVKURP OJSC — kampanija, źviazanaja z uradam Biełarusi, jakaja śpiecyjalizujecca na daśledavańniach, raspracoŭcy i vytvorčaści radyjołakacyjnych sistem i sistem kiravańnia ŭzbrajeńniem;
• zavod «Lehmaš» — biełaruskaja kampanija, jakaja vyrablaje bojeprypasy dla abaronnaha siektara;
• KB «Bieśpiłotnyja viertaloty» / KB Unmanned Helicopters (UAVHeli) — biełaruski raspracoŭščyk i vytvorca bieśpiłotnych latalnych aparataŭ.

U svaju čarhu, Kanada ŭviała sankcyi suprać 10 fizičnych i 12 jurydyčnych asob Biełarusi. Pra heta paviedamiŭ urad hetaj krainy:

Jurydyčnymi asobami, u dačynieńni da jakich uviedzienyja kanadskija sankcyi, stali:

• atrad milicyi asablivaha pryznačeńnia (AMAP);
• Hałoŭnaje ŭpraŭleńnie pa baraćbie z arhanizavanaj złačynnaściu i karupcyjaj (HUBAZiK) MUS;
• Kamitet dziaržaŭnaj biaśpieki (KDB);
• AAT «Stankahomiel»;
• AAT «Biełaruski mietałurhičny zavod» (Žłobin);
• AAT «Zavod «Lehmaš» (Orša);
• kanstruktarskaje biuro «Bieśpiłotnyja viertaloty» (Minsk);
• TAA «Łabaratoryja adytyŭnych technałohij» (Minsk);
• TAA «Ruchsiervamator» (Minsk);
• Minski padšypnikavy zavod;
• Minski zavod šaścierniaŭ;
• AAT «Vistan» (Viciebsk).

Siarod fizičnych asobaŭ, uklučanych u sankcyjnyja śpisy Kanady:

• Halina Łukašenka (aficyjnaja žonka Alaksandra Łukašenki, ź jakoj jon 30 hadoŭ nie žyvie);
• žonka i dzieci kamandzira AMAP HUUS Minharvykankama Dźmitryja Bałaby Volha Maršałovič, Arciom Bałaba i Maksim Bałaba;
• žonka i syn namieśnika ministra MUS — kamandujučaha ŭnutranymi vojskami Mikałaja Karpiankova Iryna i Ihar Karpiankovy;
• dyrektar «Lehmaša» Uładzisłaŭ Paŭlenka;
• dyrektar KB «Bieśpiłotnyja viertaloty» Uładzimir Čudakoŭ;
• hienieralny dyrektar BMZ Anatol Savianok;
• načalnik HUBAZiK MUS Andrej Ananienka.

Adznačajecca, što Kanada ŭvodzić sankcyi «ŭ suviazi z hrubymi i sistematyčnymi parušeńniami pravoŭ čałavieka režymam Łukašenki ŭ Biełarusi, a taksama jaho padtrymkaj parušeńnia Rasiejaj suvierenitetu i terytaryjalnaj cełasnaści Ukrainy».

Kamientary da artykuła