Daradca Trampa źviazaŭ jaho rezkija zajavy ab Ukrainie z zatrymkaj «pahadnieńnia pa karysnych vykapniach»
Daradca prezidenta ZŠA pa nacyjanalnaj biaśpiecy Majk Uołtc, kamientujučy apošnija rezkija zajavy Donalda Trampa ŭ bok Ukrainy, zhadaŭ pra «eskałacyju rytoryki» i «supraciŭ» zaklučeńniu pahadnieńnia ab raspracoŭcy ŭkrainskich karysnych vykapniaŭ. Pra heta jon skazaŭ heta ŭ efiry Fox News.
Majk Uołtc. Fota: AP Photo / Jacquelyn Martin
Pavodle Uołtca, «nie ŭsie» jašče pryniali zaviaršeńnie epochi «biaskoncaj vajny, jakaja niasie śmierć i razbureńni z usich bakoŭ, kaštuje sotni miljardaŭ dalaraŭ i zabiraje sotni tysiač, kali nie miljony žyćciaŭ».
«Ja dumaju, što rasčaravańnie nasamreč uźnikła tolki ciaham apošniaha tydnia praz hety dziŭny supraciŭ, eskałacyju rytoryki vakoł pradstaŭleńnia taho, što my ličym absalutnaj mahčymaściu — a mienavita, kab Złučanyja Štaty inviestavali ŭ ukrainskuju infrastrukturu, kab jany raspracoŭvali svaje karysnyja vykapni, svaje pryrodnyja resursy».
Uołtc padkreśliŭ, što ZŠA — u adroźnieńnie ad Jeŭropy — nie chočuć pradastaŭlać bolšaść dapamohi ŭ vyhladzie «kredytaŭ, jakija pahašajucca za košt pracentaŭ ad aryštavanych rasijskich aktyvaŭ».
«My ličym, što amierykanskija padatkapłacielščyki zasłuhoŭvajuć viartańnia bolšaj častki svaich inviestycyj. Usio heta — mahčymaść dla Ukrainy. Jany pavinny ŭbačyć heta, a zamiest hetaha my bačym takuju eskałacyju rytoryki i supraciŭ, i prezident (Tramp) nie źbirajecca hetaha ciarpieć», — dadaŭ Uołtc.
Paźniej učora Tramp abvinavaciŭ Ukrainu ŭ zryvie ździełki pa redkaziamielnych mietałach.