Čynoŭnica Homielskaha abłvykankama ŭ razmovie z błohieram pryznałasia ŭ palityčnych čystkach
Viadomy błohier-prankier Andrej Pavuk razhavaryŭ namieśnicu načalnika Hałoŭnaha ŭpraŭleńnia kultury Homielskaha abłvykankama Anastasiju Łysienku. Jana nie paznała błohiera i raskazała jamu pra palityčnyja čystki ŭ svajoj halinie, piša «Fłahštok».
Skrynšot videa Andreja Pavuka
Błohier zadaŭ pytańnie čynoŭnicy, pryvioŭšy słovy Łukašenki pra toje, što «vorahi dziaržavy siadziać da pary da času pad vienikam»:
«U vašaj struktury takich dastatkova. Bolš, čym dzie-niebudź. Hetaha być nie pavinna», — skazaŭ Łukašenka ministru kultury.
— Jość u vas takija, jak u vas z čystkami? — spytaŭ Pavuk.
— Tak. Hetyja fakty byli, i 2020-ty hod, na žal ci na ščaście, napeŭna, pakazaŭ toje, što ŭ lubych halinach našaj ekanomiki, u tym liku i ŭ sacyjalnaj śfiery, takija fakty byli. Jany byli, i my ličym, što vidavočnyja pradstaŭniki, jakija nie padtrymlivajuć dziaržaŭnuju ŭładu, jaje budovu i hetak dalej, nie majuć prava pracavać u dziaržaŭnych biudžetnych arhanizacyjach, — adkazała Łysienka.
Jana dadała, što, «na žal, u našaj halinie byli takija pradstaŭniki — heta nie jość dobra»:
«Stalicu heta zakranuła bolš, zachodnija rehijony — jašče bolš. A my niejak adreahavali na heta spakajniej. Adnak fakty byli, i my ich viedajem».
U svaim videa błohier nahadaŭ, što ŭ artykule 14 Pracoŭnaha kodeksa Biełarusi havorycca pra toje, što abmiežavańnie ŭ pracoŭnych pravach u zaležnaści ad palityčnych pierakanańniaŭ źjaŭlajecca dyskryminacyjaj.