«Nichto z kiraŭnictva ź im nie spračajecca». Jakija byłyja siłaviki absieli kiraŭničyja pasady bujnych biełaruskich pradpryjemstvaŭ

Vajskoviec, vyratavalnik, milicyjanier i supracoŭnik KDB na «Naftanie»

Na «Naftanie» pasadu namieśnika hienieralnaha dyrektara pa biaśpiecy, režymu i kadrach zajmaje były supracoŭnik KDB Ihar Nikicin. Pavodle infarmacyi «Miedyjazony», atrymanaj ad inicyjatyvy Belpol, Nikicin słužyŭ va ŭpraŭleńni KDB Viciebskaj vobłaści, paśla pracavaŭ u adździele adukacyi i na Viciebskaj brojlernaj ptuškafabrycy.

Były supracoŭnik pradpryjemstva Ihar kaža, što Nikicin pryjšoŭ na źmienu Andreju Sinicu — padpałkoŭniku KDB u adstaŭcy.

«Nikicin zajmajecca čystkami niełajalnych ludziej na zavodzie. Jon ciapier car i boh na «Naftanie», nichto z kiraŭnictva ź im ciapier nie spračajecca. Kali jon skazaŭ, što čałavieka treba zvolnić, to jaho zvalniajuć, niahledziačy na toje, što čałaviek vialiki śpiecyjalist», — kaža Ihar.

U słužbie biaśpieki zavoda taksama pracuje Alaksiej Žahłanaŭ — były načalnik Navapołackaha HAUS. Jon pravodzić asabistyja hutarki z supracoŭnikami, jakija znachodziacca ŭ niezaležnym prafsajuzie.

Jašče adzin z supracoŭnikaŭ, jakija pavyšajuć «łajalnaść «rabotnikaŭ» Naftana» — Viačasłaŭ Asaka. Da «Naftana» Asaka pracavaŭ namieśnikam načalnika Navapołackaha HAUS. Na zavod jon pryjšoŭ letam 2023 hoda razam z byłym vajskoŭcam Maksimam Azarčykam, jaki słužyŭ u Siłach śpiecyjalnych apieracyj (SSA). Razam z Azarčykam jany stali supracoŭnikami adździeła infarmacyjnaj raboty i sacyjalnaha raźvićcia. Zadača Azarčyka i Asaki — «dapamahčy zavadčanam razabracca ŭ pytańniach składanaha nacyjanalnaha i mižnarodnaha paradku dnia».

Ihar kaža, što z 2020 hoda z zavoda zvolnili bolš za sotniu čałaviek (pa stanie na 2023 hod na «Naftanie» pracavała amal 10 tysiač čałaviek). Ludziej praciahvajuć vyklikać na hutarki, brać «na ałovak», pieraśledavać za łajki i padpiski.

Padpałkoŭnik milicyi i były kadebešnik na «Hrodna Azot»

Na «Hrodna Azot» pracujuć jak minimum dva siłaviki: namieśnik hienieralnaha dyrektara pa biaśpiecy i kadrach Aleh Žyvuška i namieśnik pa sacyjalnych pytańniach i ideałahičnaj rabocie Dźmitryj Habryjelčyk.

Žyvuška raniej pracavaŭ u KDB. Na zavod jon pryjšoŭ paśla pratestaŭ 2020 hoda. Pavodle infarmacyi telehram-kanała «Stačkom Azota», razam ź inšymi kiraŭnikami pradpryjemstva jon datyčny da represij i zvalnieńniaŭ supracoŭnikaŭ. Jak tolki ŭ supracoŭnika, jaki znachodzicca ŭ niezaležnym prafsajuzie abo ŭdzielničaŭ u pratestach, zakančvaŭsia kantrakt, novy ź im nie padpisvali.

«Kali jon pryjšoŭ na zavod, to zamiest taho, kab unikać u dakumientaabarot i svaje słužbovyja abaviazki, zajaviŭ na naradzie, što ŭsio budzie pavodle «statuta». Na mnohich supracoŭnikaŭ akazvaŭ cisk i kazaŭ: «My z vami nie spracujemsia, šukajcie pracu», — raskazali «Miedyjazonie» ŭ inicyjatyvie «Rabočy ruch».

Dźmitryj Habryjelčyk — padpałkoŭnik i były načalnik transpartnaj milicyi Hrodna. Karjeru ŭ orhanach pačaŭ z pasady kiroŭcy ŭ 2001 hodzie. U 2012 hodzie staŭ namieśnikam načalnika AUS pa ideałahičnaj rabocie i kadravym zabieśpiačeńni, a ŭ mai 2019 hoda — načalnikam transpartnaj milicyi.

Tam Habryjelčyk prapracavaŭ krychu bolš za dva hady. 1 vieraśnia 2021 hoda adździeł rasfarmavali, a milicyjanier pajšoŭ na «zasłužany adpačynak».

Kali mienavita Habryjelčyk pryjšoŭ pracavać na «Hrodna Azot», nieviadoma. U vieraśni 2022 hoda były milicyjanier vystupiŭ sa zvarotam pra značnaść «Dnia narodnaha adzinstva» ŭ jakaści namieśnika hienieralnaha dyrektara pradpryjemstva.

Vajskovy raźviedčyk na MTZ i kadebešniki na inšych bujnych zavodach

Eks-supracoŭniki KDB pracujuć i na inšych bujnych pradpryjemstvach Biełarusi. Naprykład, na MZKC pasadu namieśnika dyrektara pa biaśpiecy ŭznačalvaje 48-hadovy Alaksandr Viecianievič. Raniej jon kiravaŭ Maładziečanskim mižrajonnym adździełam KDB.

U «Amkadory» pasadu namieśnika dyrektara pa biaśpiecy zajmaje 68-hadovy pałkoŭnik milicyi Alaksandr Aŭsianski. Pavodle źviestak Belpol, jakija atrymała vydańnie «Lusterka», da «Amkadora» Aŭsianski pracavaŭ u Radzie biaśpieki — hałoŭnym śpiecyjalistam u adździele pa baraćbie z karupcyjaj u dziaržorhanach. Na takoj ža pazicyi — u kamitecie pa baraćbie z karupcyjaj pry administracyi Łukašenki.

Na «Biełšynie» za biaśpieku taksama adkazvaje były kadebešnik. 44-hadovy Alaksandr Šaško pracavaŭ u Babrujskim haradździele KDB.

Eks-supracoŭnik hetaha viedamstva, 55-hadovy Ihar Karotki, pracuje na BiełAZie. Jon słužyŭ u Staŭbcoŭskim mižrajonnym adździele KDB i va ŭpraŭleńni kamiteta pa Minsku i Minskaj vobłaści.

Pasadu namieśnika dyrektara pa biaśpiecy na MAZie zajmaje 44-hadovy Siarhiej Dziomin. Da 2006 hoda jon pracavaŭ u milicyi, a dzie potym — nieviadoma. Pavodle infarmacyi «Našaj Nivy», jon słužyŭ u KDB.

Na MTZ za biaśpieku adkazvaje były vajskovy raźviedčyk, 40-hadovy Maksim Ahirenka. Pavodle źviestak «Lusterka» ad Belpol, jon pačynaŭ słužbu ŭ vajskovaj čaści 5448 unutranych vojskaŭ u Minsku jak kamandzir uzvoda. Skončyŭ Instytut nacbiaśpieki KDB, pajšoŭ słužyć u čaść 64171 — heta ŭpraŭleńnie vajskovaj kontrraźviedki KDB.

Kadebešniki ŭ IT i sotavaj suviazi

U krasaviku hetaha hoda kampaniju MTS uznačaliŭ Uładzimir Kozyr — były kiraŭnik KDB pa Minsku i Minskaj vobłaści. Na hetaj pasadzie jon prapracavaŭ ź lipienia 2020 hoda, a raniej słužyŭ načalnikam apieratyŭna-pošukavaha ŭpraŭleńnia KDB.

Paśla pratestaŭ 2020 hoda novaja pasada — namieśnik dyrektara pa biaśpiecy i kadrach — źjaviłasia i ŭ «Biełtelekamie». U lipieni 2021 hoda jaje zaniaŭ Andrej Zaliŭka. Na sajcie pradpryjemstva havorycca, što z 1995 pa 2021 hod Zaliŭka znachodziŭsia na vajskovaj słužbie, a na «Biełtelekamie» ŭ jaho abaviazki ŭvachodzić «kiraŭnictva i kantrol dziejnaści strukturnych padraździaleńniaŭ pradpryjemstva pa zabieśpiačeńni režymnych mieraŭ, u tym liku fizičnaj achovy, infarmacyjnaj i ŭłasnaj biaśpieki, abarony dziaržaŭnych tajamnic».

Adzin z byłych supracoŭnikaŭ KDB kiruje Parkam vysokich technałohij u Minsku. Uletku 2023 hoda načalnikam PVT Alaksandr Łukašenka pryznačyŭ Alaksandra Bazanava. Raniej jon pracavaŭ na roznych pasadach u KDB, dziaržaŭnym sakrataryjacie Rady biaśpieki, Ministerstvie zamiežnych spraŭ i Saviecie ministraŭ Biełarusi. Ź listapada 2010 hoda ŭznačalvaŭ infarmacyjna-analityčny centr pry administracyi Łukašenki.

• 1
• 3
• 1
• 12
• 0
• 0
• 9
• 0