Ukraincy ŭziali ŭ pałon uradženca Mahilova i prysudzili jamu 15 hadoŭ za dziaržaŭnuju zdradu
43-hadovy Dźmitryj Kastahładaŭ byŭ kadravym vajskoŭcam Uzbrojenych sił Ukrainy, słužyŭ u Krymie. Ale paśla 2014 hoda staŭ zdradnikam.
Dźmitryj Kastahładaŭ. Fota: th-kanał «Dožduś tiebia»
Dźmitryj Kastahładaŭ naradziŭsia ŭ 1982 hodzie ŭ Mahilovie, ale mieŭ hramadzianstva Ukrainy. Da krasavika 2014-ha jon byŭ kadravym vajskoŭcam Uzbrojenych sił Ukrainy, słužyŭ u Krymie. Paśla taho, jak Rasija zachapiła paŭvostraŭ, Dźmitryj pierajšoŭ na bok akupantaŭ i pierabraŭsia na Danbas.
Dźmitryj Kastahładaŭ. Fota: sacsietki
U 2014 hodzie Kastahładaŭ žyŭ u Daniecku, paśla akupacyi jakoha ŭstupiŭ va ŭzbrojenaje farmavańnie «Kalmius» tak zvanaj «Danieckaj narodnaj respubliki». Pra heta paviedamlała ŭkrainskaje vydańnie «Sudovij rieportier».
Viadoma, što ŭ 2022 hodzie Kastahładaŭ padpisaŭ kantrakt z vajskovaj čaściu ŭ Sievastopali, ale praz čatyry miesiacy skasavaŭ damovu, bo tam jamu nie płacili. Tady jon uładkavaŭsia ŭ pryvatnuju vajskovuju kampaniju «Kanvoj». Taksama «Naša Niva» daviedałasia, što Dźmitryj pracavaŭ u pryvatnaj achoŭnaj arhanizacyi «Taur» i na Alminskim zavodzie budaŭničych materyjałaŭ.
Dźmitryj Kastahładaŭ. Fota: sacsietki
30 lipienia 2023 hoda ŭ rasijskim Jakucku Kastahładaŭ padpisaŭ čarhovy vajskovy kantrakt i byŭ pryznačany kamandziram adździaleńnia 1466-ha motastrałkovaha pałka VS RF. Čamu ŭ Jakucku? Bo tam dobraachvotnikam płacili bolš.
Mužčyna mieŭ zvańnie staršaha siaržanta, śpiecyjalnaść — pamiežnyja vojski, śpiecyjalist radyjotechničnaha pasta. 18 krasavika 2024 hoda hrupu rasijskich vajskoŭcaŭ nakiravali na šturm ukrainskich pazicyj u rajonie Staramłynaŭki, siała ŭ Vałnavachskim rajonie Danieckaj vobłaści. Tam Kastahładaŭ trapiŭ u pałon.
5 žniŭnia 2024 hoda Družkoŭski haradski sud Danieckaj vobłaści pryznaŭ Dźmitryja Kastahładava vinavatym u dziaržaŭnaj zdradzie. Jaho pryhavaryli da 15 hadoŭ pazbaŭleńnia voli z kanfiskacyjaj majomaści.
Viadoma, što ŭ mužčyny jość dvoje dziaciej.
Čytajcie taksama:
Na vajnie źnik bieź viestak biełaruski zvarščyk, jaki pavajavaŭ za Rasiju nie bolš za miesiac