Biełastocki emihrant pachvaliŭ prapahandyscki film «Čužoje nieba», jaki navat nie hladzieŭ — za 30 jeŭra

Ciapier prapahandysty śmiajucca z Uładzimira Łazarava i robiać vyhlad, što jon daŭ im asensavany kamientar paśla prahladu hetaha kino.

Skrynšot ź videavodhuku Uładzimira na film «Čužoje nieba»

U praŭładnych pamyjnych kanałach apublikavali videavodhuk na prapahandyscki film «Čužoje nieba» ad babrujskaha aktyvista Uładzimira Łazarava, jaki ciapier žyvie ŭ emihracyi ŭ Biełastoku.

Zrešty, Łazaraŭ byŭ i adnym z hierojaŭ kino. Jamu jašče ŭ vieraśni 2024 hoda pazvanili ŭ telehram «svaje chłopcy, zmahary ź Vilni», jakija paprasili padrychtavać materyjał dla ich miedyja. Ale ni imionaŭ, ni nazvy hetaha miedyja Uładzimir nie zapomniŭ i nie ŭdakładniaŭ.

Za čarhovy ekskluziŭ ciapier vydajecca «recenzija» na film, jakoj Łazaraŭ nibyta padzialiŭsia ź dziaržaŭnymi žurnalistami paśla premjery.

Nasamreč, hety rolik Uładzimir adpraviŭ zakazčykam zranku 18 sakavika, premjera ž filma adbyłasia tolki ŭviečary.

Jak ža Uładzimir zmoh acanić film, jaki jašče nie bačyŭ?

«Nu tak, ja jaho nie bačyŭ. Ale pa prośbie skazaŭ paru dobrych słovaŭ pra jaho, — prakamientavaŭ «Našaj Nivie» Łazaraŭ. — Heta ž tolki praz sutki stała viadoma, što sa mnoj čekisty razmaŭlali. A tady [zdavałasia, što heta] byli svaje, apazicyjaniery. Mnie prosta dasłali tekst i paprasili jaho ahučyć na kamieru».

Za hety vodhuk Uładzimiru ŭ toj ža dzień pieraviali 30 jeŭra (kala 100 biełaruskich rubloŭ).

«Dobraha mała, kaniečnie, u tym, što tak atrymałasia, ale ja nie rablu z hetaha trahiedyi suśvietnuju, kab leźci ŭ piatlu. Roznaje zdarajecca: i na roŭnaj darozie možna nahu złamać inšym razam. Ja potym pahladzieŭ, što mianie najbolš padkupiła: jany skazali, što pradstaŭlajuć miedyjaresurs Warta (sajt prychilnikaŭ, Zianona Paźniaka — NN). Ja jak daviedaŭsia, što da čaho, adpraviŭ im sms-ku z maciernymi słovami. Jany pračytali, što ja pra ich dumaju, ale ŭ adkaz ničoha».

Kamientary da artykuła