Achinieja pra ŠI

Mašyna zaŭsiody budzie abmiežavanaja ŭ tym, što jana moža. Što zastaniecca śfieraj čałavieka, piša analityk Alaksiej Bykaŭ — biełarus, jaki pracuje na vialikuju jeŭrapiejskuju IT-kampaniju.

Ilustracyjnaja vyjava: kadr sa śvietłavoj instalacyi «Duha» aŭtarstva Arvidasa Bujnaŭskasa & fume

Mała što ŭ mianie vyklikaje takuju viasiołuju reakcyju, jak chajp vakoł hienieratyŭnaha štučnaha intelektu ad usich hetych pychlivych infamachlaroŭ i śpiekulantaŭ, jakija zarablajuć hrošy z burbałki ad razdźmutaj kapitalizacyi Nvidia i TSMC i z surjoznym tvaram razvažajuć, što «Štučny intelekt chutka zamienić usich prahramistaŭ / piśmieńnikaŭ / inžynieraŭ / turystyčnych hidaŭ», i pazabiraje va ŭsich ludziej pracu.

Takuju achinieju čałaviek moža kazać u niekalki vypadkach.

1. Kali čałaviek ranćje i žyvie z hetaha chajpu.

2. Čałaviek uvohule słaba sabie ŭjaŭlaje, što takoje Computer Science i na jakich pryncypach jano pabudavana.

3. Čałaviek nikoli ŭ žyćci nie pracavaŭ z žyvymi ludźmi na realnych prajektach i dumaje, što prafiesija prahramista — heta na 100% napisańnie kodu.

Mnohija ludzi, na jakich takaja achinieja raźličanaja, dumajuć, što prahramist kožny dzień 8 hadzin piša sabie kod, i na hetym usio. Dapuščeńnie, jakoje robiać ludzi, nastupnaje: «Aha, prahramisty 8 hadzin na dzień pišuć kod, a mašyny chutka buduć pisać kod našmat lepšy i chutčejšy za čałavieka, tamu prafiesija źniknie».

Aha, jak ža.

Prahramist (jak i bolšaść inšych ajcišnych i inžyniernych prafiesij) — heta pra vyrašeńnie prablem zamoŭcy i stvareńnie vartaści dla jaho. Kod — heta tolki instrumient, jaki nie zajmaje i pałovy času. Našmat bolš času zajmaje inšaje.

Mašyna i praŭda moža dapamahčy z vyrašeńniem prablemy i stvareńniem hatovaha rašeńnia. Napiša vam cudoŭny kod i padkaža, jak jaho zapuścić.

Ale kožnaje techničnaje rašeńnie pavinna abapiracca na dakładnaje razumieńnie:

— što pryniasie zamoŭcu vartaść,

— jakija realnyja patreby vašaha klijenta (ludzi časta błytajuć i padmianiajuć realnyja patreby niejkim adnym rašeńniem),

— u jakim kantekście dziejničaje arhanizacyja,

— jakija intaresy stejkchołdaraŭ,

— jakich źmienaŭ my chočam dasiahnuć, kali stvarajem niejkaje rašeńnie.

I ŭsio pieraličanaje vyšej idzie ad ČAŁAVIEKA, ad jahonaj voli. I adekvatna acanić hetyja faktary mašyna nie ŭmieje (ludzi hetamu dajuć rady našmat lepiej, ale taksama vielmi i vielmi niedaskanała, nie budziem ich pieraaceńvać).

Nie viercie piesimistam-deterministam-prapahandystam.

Mašyna moža chutčej za čałavieka paličyć niejki składany intehrał albo niešta zapomnić. Ale nie mašyna vyrašaje, što važnaje, kaštoŭnaje, jakija vašy realnyja patreby, nie zdolnaja acanić kantekst i intaresy žyvych ludziej.

Nie viercie infarmacyjnym machlaram. Raboty kožnamu chopić na jaho viek. Vy prosta sabie ŭjavić nie možacie, jakaja prablema dla IT-kampanij znajści sabie nie zorak, a chacia b prosta prytomnych i adekvatnych rabotnikaŭ navat ciapier, navat na pačatkovyja pazicyi.

Raboty chapaje dla ŭsich.

Kamientary da artykuła