Litoŭskija pamiežniki zatrymali biełarusa z padroblenymi dakumientami na mašynu

Na pamiežnym kantrolnym punkcie ŭ Miednikach litoŭskija pamiežniki zatrymali aŭtamabil Hyundai Tucson, jakim kiravaŭ 25-hadovy hramadzianin Biełarusi. U ich uźnikła padazreńnie, što rehistracyjnaje paśviedčańnie, identyfikacyjny numar (VIN) i dziaržaŭnyja numary aŭtamabila — padroblenyja, piša pres-słužba litoŭskaj Słužby achovy dziaržaŭnaj miažy.

Zdareńnie adbyłosia ŭ noč na 20 sakavika, a aŭtamabil kiravaŭsia ź Litvy ŭ Biełaruś. 

Padčas pravierki transpartnaha srodku i dakumientaŭ mužčyna pakazaŭ pamiežnikam rehistracyjnaje paśviedčańnie na aŭtamabil, nibyta vydadzienaje ŭ Aŭstryi. Jano adrazu vyklikała padazreńni, a pry dapamozie śpiecyjalnaha abstalavańnia było vyjaŭlena, što dakumient nie adpaviadaje patrabavańniam dla vyrabu kaštoŭnych papier.

Detalova ahledzieŭšy aŭtamabil, pamiežniki taksama zasumniavalisia ŭ aŭtentyčnaści VIN hetaha adnosna novaha pazadarožnika 2020 hoda vypusku, vybitaha na kuzavie i vyhraviravanaha pad piarednim škłom, a taksama ŭ sapraŭdnaści identyfikacyjnych nalepak.

Dziaržaŭnyja numary aŭtamabila, jak miarkujecca, byli taksama padroblenyja: numarnaja tablička nie maje achoŭnych elemientaŭ, nalepka razdrukavanaja na kalarovaj łaziernaj drukarcy i niaroŭna abrezanaja.

Padčas dopytu kiroŭca rastłumačyŭ, što pavinien byŭ tolki dastavić pazadarožnik ź Litvy ŭ Biełaruś, a pra padrobku dakumientaŭ daviedaŭsia tolki ciapier ad pamiežnikaŭ. Tym nie mienš, jaho aryštavali pakul što na miesiac. 

Uvohule ž za takoje złačynstva litoŭskim zakonam praduhledžanyja hramadskija raboty, štraf, abmiežavańnie svabody, aryšt albo pazbaŭleńnie voli na termin da troch hadoŭ.

Kamientary da artykuła