Namieśnik ministra abarony Polščy Paveł Bejda rastłumačyŭ, čamu jahonaja kraina vyrašyła vyjści z Ataŭskaj kanviencyi, jakaja zabaraniaje supraćpiachotnyja miny, i nie vyklučyŭ, što miaža ź Biełaruśsiu, a taksama z Rasijaj, budzie zaminiravanaja, piša «Biełsat».
18 sakavika ministry abarony Estonii, Łatvii, Litvy i Polščy vypuścili sumiesnuju zajavu pra vychad hetych krain z Ataŭskaj kanviencyi. Jana praduhledžvaje admovu ad vykarystańnia supraćpiachotnych minaŭ, spynieńnie ich vytvorčaści i źniščeńnie zapasaŭ.
Litva dałučyłasia da hetaj damovy ŭ 2003 hodzie, u nastupnym hodzie — Estonija, u 2005-m — Łatvija. Polšča ratyfikavała damovu ŭ 2021-m.
Z tych časoŭ, jak adznačajecca ŭ zajavie ministraŭ abarony, «situacyja ź biaśpiekaju ŭ našym rehijonie istotna pahoršyłasia»:
«Vajennyja pahrozy ŭ dačynieńni krainaŭ-členaŭ NATA, što miažujuć z Rasijaj i Biełaruśsiu, istotna vyraśli. Z uvahi na takuju niestabilnuju situacyju ŭ śfiery biaśpieki, źviazanaj z ahresijaj Rasii i stałaj pahrozaj, što jana ŭjaŭlaje dla jeŭraatłantyčnaj supolnaści, nadzvyčaj važna vyznačyć usie zachady, jakija mohuć być užytyja dziela ŭmacavańnia našaha patencyjału strymlivańnia i abarony».
Kiraŭniki Minabarony čatyroch krain vyrašyli, što dazvoł na vykarystańnie supraćpiachotnych minaŭ daść uzbrojenym siłam «hnutkaść i mahčymaść vybaru» dla ŭmacavańnia abarony.
«Naša pastanova dasyłaje vyrazny sihnał: našyja krainy hatovyja i zdolnyja vykarystoŭvać lubyja srodki, nieabchodnyja dla achovy našaj terytoryi i svabody», — padkreślili ministry.
U efiry polskaha radyjo RMF FM namieśnik kiraŭnika Minabarony Polščy Pavieł Bejda zajaviŭ, što krainam rehijonu «nie pakinuli vybaru»:
«Situacyja na miažy surjoznaja. Ja kažu pra polska-biełaruskuju i polska-rasijskuju miažu. Biełaruś znachodzicca na pavadku ŭ Rasii: što skaža Pucin, na toje i pahodzicca Łukašenka. Źviarnicie ŭvahu, ź jakoha kirunku była atakavanaja Ukraina. Z boku Biełarusi».
Čynoŭnik taksama paviedamiŭ, što ciapier Polšča nie maje supraćpiachotnych minaŭ, ale kraina zdolnaja ich vypuskać. Jon nie vyklučyŭ, što takich minaŭ budzie vyrablena niekalki socień tysiač abo navat miljon.
Pamiežnuju achovu Polščy chočuć papoŭnić previentyŭnymi hrupami
U Polščy byłomu biełaruskamu pamiežniku dali šeść hadoŭ za pieravozku mihrantaŭ bolš za 20 hadoŭ tamu
Na biełaruska-polskaj miažy zapracavała sistema, jakaja dazvalaje prachodzić miažu biez udziełu pamiežnika. Jak jana pracuje?
U Polščy dla achovy miažy ź Biełaruśsiu stvaryli novuju dyviziju
Ciapier čytajuć
Vyjšaŭ na svabodu biełarus, jakoha ŭ svoj čas prysudzili da pažyćciovaha źniavoleńnia. Heta pieršy viadomy taki vypadak10
Kamientary