Indyjski kalekcyjanier kupiŭ u ZŠA samaha darahoha ščaniuka ŭ śviecie

Vaśmimiesiačny ščaniuk z ZŠA staŭ samym darahim sabakam u śviecie. Jaho pradali za 5,7 miljona dalaraŭ, paviedamlaje New York Post.

Kadabomb Akami

Ščaniuk pa mianušcy Kadabomb Akami — heta redki hibryd vaŭka i kaŭkazskaj aŭčarki. Jon vyłučajecca nie tolki svaim niezvyčajnym pachodžańniem, ale i fizičnymi danymi. Vaśmimiesiačny ščaniuk užo važyć bolš za 75 kh i dasiahaje 76 sm u karku, što robić jaho sapraŭdnym hihantam siarod sabak.

Pra hetaha ŭnikalnaha hadavanca zahavaryli ŭsie bujnyja suśvietnyja ŚMI. Niahledziačy na svoj juny ŭzrost, Akami ŭžo demanstruje vydatnyja achoŭnyja jakaści, što i pryciahnuła ŭvahu jaho ŭładalnika.

Satyš, viadomy zavodčyk ź indyjskaha Banhałora, płanuje vykarystać Akami ŭ jakaści vartavoha sabaki, bo takija hibrydy słaviacca svajoj addanaściu i rozumam. 

Akami siłkujecca tryma kiłahramami syroha kurynaha miasa ŭ dzień, što dapamahaje padtrymlivać jaho vydatnuju fizičnuju formu.

51-hadovy Satyš — daśviedčany sabakavod, u jaho kalekcyi naličvajecca kala 150 sabak roznych parod, a jahonaja fierma dla hadavancaŭ zajmaje siem akraŭ (kala 2,8 hiektara). Kadabomb Okami byŭ nabyty z metaj paznajomić indyjskuju publiku z hetym redkim hibrydam i prademanstravać važnaść pravilnaha dohladu za takimi žyviołami.

Kožny z sabak Satyša maje ŭłasnuju kamfortnuju budku, za imi dahladajuć šeść supracoŭnikaŭ. Sabakavod zapeŭnivaje, što jahonyja žyvioły atrymlivajuć usio nieabchodnaje, uklučajučy kłopat i ŭvahu. Jany znachodziacca pad kruhłasutačnaj achovaj.

Satyš zarablaje, udzielničajučy ŭ mierapryjemstvach i demanstrujučy svaich hadavancaŭ pa ŭsim śviecie. 

Kamientary da artykuła