HUBAZiK paćvierdziŭ infarmacyju, jakuju Supolnaść čyhunačnikaŭ paviedamlała paŭhoda tamu
Siłaviki raskazali pra zatrymańnie za chabar u 2024 hodzie padnačalenych namieśnika načalnika BČ, jaki adznačyŭsia najvialikšym chabaram krainy minułaha hoda. Pra zatrymańnie jaho padnačalenych jašče ŭ kastryčniku 2024 hoda paviedamlali niezaležnyja čyhunačniki.
Siońnia siłaviki paviedamili pra zatrymańnie troch top-čynoŭnikaŭ, jakija na praciahu troch hadoŭ prymali hrošy ad pradstaŭnikoŭ kamiercyjnych struktur za spryjalnaje vyrašeńnie pytańniaŭ ab vydzialeńni ruchomaha składu BČ. Zaviedziena šeść kryminalnych spraŭ. Padazravanyja znachodziacca ŭ SIZA i «aktyŭna supracoŭničajuć sa śledstvam», im pahražaje da 15 hadoŭ pazbaŭleńnia voli, paviedamlajuć siłaviki.
Pra hučnyja zatrymańni na BČ 11 i 12 kastryčnika 2024 hoda jašče paŭhoda tamu paviedamiła Supolnaść čyhunačnikaŭ Biełarusi.
Jany nazvali proźviščy zatrymanych:
- Vital Paniušenka — načalnik słužby pieravozak;
- Fiodar Šulankoŭ — namieśnik načalnika słužby — načalnik Centra kiravańnia pieravozkami słužby pieravozak;
- Alaksandr Ivanoŭ — pieršy namieśnik načalnika Centra kiravańnia pieravozkami słužby pieravozak — načalnik apieratyŭna-rasparadčaha adździeła CKP.
Taksama paviedamlałasia, što hetaja apieracyja praviedziena ŭ ramkach spravy pieršaha namieśnika kiraŭnika BČ Piatra Dułuba, jakoha zatrymali za chabar raniej i ŭ tajnikach jakoha znajšli $3 młn.