Polskija słužby admaŭlajuć, što praź miažu ź Biełaruśsiu pravozili vybuchoŭku
Polskija mytniki asprečyli infarmacyju pra pieravoz praz punkt propusku ŭ Terespali bujnoj partyi vybuchoŭki. U pałacie padatkovaha administravańnia ŭ Lublinie zajavili telekanału «Biełsat», što źviestki, jakija raspaŭsiudžvajuć biełaruskija słužby, — heta «prapahandysckija vysiłki režymu».
Fota: customs_bel / Telegram
«Nacyjanalnaja padatkovaja administracyja Polščy nie paćviardžaje incydentu z vyvazam z Polščy ŭ Biełaruś 580 kh vybuchovych rečyvaŭ», — zajaviŭ «Biełsatu» pres-sakratar pałaty padatkovaha administravańnia ŭ Lublinie Michał Deruś.
Hetaja ŭstanova adkazvaje za pracu mytnikaŭ u punkcie propusku ŭ Terespali na miažy ź Biełaruśsiu.
«Paviedamleńnie biełaruskaj mytnaj słužby — častka prapahandysckich vysiłkaŭ režymu. Nacyjanalnaja padatkovaja administracyja prymaje ŭsie nieabchodnyja zachady dla harantavańnia biaśpieki i efiektyŭnaha kantrolu na miažy», — zajaviŭ Michał Deruś.
Pra toje, što aficyjny Minsk raspaŭsiudžvaje dezynfarmacyju, u kamientary «Biełsatu» adznačyŭ i pres-sakratar Nadbužanskaha adździeła Pamiežnaj achovy Polščy, u jaki ŭvachodzić pierachod u Terespali, Daryjuš Sianicki.
«My nie kamientujem materyjałaŭ, što publikujuć słužby Biełarusi, razhladajučy ich jak elemienty dezynfarmacyi».
Pra zatrymańnie «najbujniejšaj u historyi Biełarusi» partyi vybuchoŭki, jakuju sprabavali pryvieźci z Polščy, biełaruskaja mytnia zajaviła 6 krasavika. Pavodle viersii prapahandystaŭ, mikraaŭtobus ź niebiaśpiečnym hruzam pavinien byŭ trapić u Rasiju.
Čytajcie taksama:
Kreml nie zhadaŭ pra padziaku Pucina Łukašenku za zatrymańnie vybuchoŭki na miažy
Pucin padziakavaŭ Łukašenku za zatrymańnie paŭtony vybuchoŭki na miažy
Na BT pakazali zatrymanaha kiroŭcu, jaki jechaŭ na busie z vybuchoŭkaj
U Biełaruś sprabavali ŭvieźci najbujniejšuju ŭ historyi krainy partyju vybuchoŭki — 580 kh