Dačka biełarusaŭ stała ŭdzielnicaj kulinarnaha telešou ŭ Ispanii
Amierykanka ź biełaruskimi karaniami Aryjana Fiejhina stała ŭdzielnicaj 13-ha siezona ispanskaha varyjantu kulinarnaha konkursu MasterChef, jaki tranślujecca hałoŭnym telekanałam hetaj krainy La 1, piša sajt «Biełaruś i mir».
Aryjana Fiejhina na MasterChef Espana. Fota: rtve.es
Jak skazana ŭ pradstaŭleńni kankursantaŭ na sajcie šou, Aryjanie 20 hadoŭ, jana naradziłasia ŭ siamji biełarusaŭ u štacie Miniesota ŭ ZŠA, ale voś užo dva hady žyvie ŭ Barsiełonie. Budučy starejšaj ź piaci bratoŭ i siaścior, zaŭsiody lubiła hatavać dla ich.
Heta nie pieršaje źjaŭleńnie Fiejhinaj na MasterChef, bo ŭ 12 hadoŭ jana prymała ŭdzieł u dziciačaj viersii prajekta — MasterChef Junior — u Štatach, dzie paznajomiłasia z adnym sa svaich kumiraŭ — brytanskim restarataram Hordanam Ramzi.
Usie 16 udzielnikaŭ konkursu. Fota: rtve.es
Ciapier dziaŭčyna zajmajecca stvareńniem kantentu pra ježu i styl žyćcia ŭ sacsietkach, maje ŭ tyktoku bolš za 2,5 miljonaŭ padpisčykaŭ. Raniej zasnavała pryvatnuju kiejterynhavuju kampaniju. Zaŭsiody viasiołaja i zapeŭnivaje, što ź jaje tvaru vielmi ciažka ścierci ŭśmiešku.
U finalnuju častku 13-ha siezona ispanskaha MasterChef dačka biełarusaŭ była adabrana ŭ liku 16 pretendentaŭ. Paśla dvuch epizodaŭ konkursu ź jaho vybyli ŭžo try ŭdzielniki: dvoje pa rašeńni žury, adzin praz prablemy sa zdaroŭjem.
Darečy, jak paviedamiŭ telekanał La 1, premjerny vypusk prajekta, pakazany ŭviečary ŭ paniadziełak 31 sakavika, staŭ lidaram svajho efirnaha času z dolaj 14,4 pracenta i 2 985 000 unikalnych hledačoŭ.
Čytajcie taksama:
Vieniesuełka ź Biełarusi vyjhrała kulinarnaje šou «Bitva šefaŭ» u Maskvie
Chalezin: Žyćcio paśla śmierci isnuje, my ŭsie žyviom u hrybnoj matrycy