Kampanija, jakaja katała Tyla Švajhiera pa Minsku, znajšła hrošy. Ale kamandu ŭžo raschapali

Kampanija Blockchain Sports Ecosystem, jakaja niekalki miesiacaŭ nie vypłačvała zarobki supracoŭnikam, narešcie pahasiła častku zapazyčanaści, daviedaŭsia Devby.io.

Z 25 sakavika IT-hrupa Blockchain Sports Ecosystem pajšła na vymušany prastoj z-za finansavych prablem. Kampanija paviedamiła supracoŭnikam, što šukaje inviestaraŭ, kab zakryć usie daŭhi, u tym liku pa arendzie i zarobkach, i adnavić pracu.

Ale praź niekalki dzion supracoŭniki niečakana daviedalisia aptymistyčnuju navinu: kampanija damoviłasia z bujnym inviestaram pra doŭhaterminovaje finansavańnie.

Kampanija nie ŭdakładniła padrabiaznaści pieramoŭ, u pryvatnaści, nie ahučyła imia inviestara. Ale paabiacała ŭžo z 1 krasavika pačać pahašeńnie zapazyčanaściaŭ «pierad supracoŭnikami i kontrahientami va ŭsich adździełach i padraździaleńniach».

Pa słovach rabotnikaŭ Blockchain Sports Ecosystem, ź jakimi Devby.io ŭdałosia pahutaryć, situacyja z pryciahnieńniem inviestara poŭnaja roznych čutak. Pavodle adnoj ź viersij, kiraŭnictva nibyta znajšło mahčymaść pazyčyć bujnuju sumu hrošaj, jakoj chapiła na pahašeńnie daŭhoŭ i «navat na zarobki za paru miesiacaŭ pracy».

«Chodziać takija čutki, ale chto pazyčyŭ hrošy i što budzie dalej — nieviadoma», — raskazaŭ adzin z supracoŭnikaŭ. Pavodle inšaha supracoŭnika, «čuŭ, što pošuki inviestara praciahvajucca, značyć, hrošaj niama».

Tym nie mienš z pačatku krasavika kampanija pačała pahašać daŭhi. U pryvatnaści, jak kažuć supracoŭniki, jana zakryła zapazyčanaść pierad padatkovaj i FSAN, a taksama apłaciła arendu ofisa.

Što tyčycca zapazyčanaściaŭ pa zarobkach, to kampanija całkam raźličyłasia tolki z tymi supracoŭnikami, jakija pryniali rašeńnie zvolnicca.

«Kali zajava na zvalnieńnie była padpisanaja, naprykład, 24 sakavika, to supracoŭnik atrymaŭ poŭny raźlik da 24-ha čysła, kali 28-ha — to da 28-ha. U maim vypadku suma nabiehła sa studzienia da dnia zvalnieńnia, heta značyć faktyčna za 3 miesiacy. Plus adpusknyja i žudasny kaeficyjent 1,3% ad akładu za zatrymku z ulikam taho, što niejki čas my ŭsie byli ŭ prastoi i atrymlivali 2/3 ad akładu», — padzialiŭsia padrabiaznaściami adzin z byłych supracoŭnikaŭ kampanii.

Kolki čałaviek pajšło z kampanii — nieviadoma. Supracoŭniki kažuć, što šmat. «Pa maich padlikach, zvolniłasia ŭžo čałaviek z 300», — acaniŭ adtok adzin z rabotnikaŭ. Pavodle inšaha surazmoŭcy, «u dzień, kali ja padpisvaŭ abychodny list, navat byli nievialikija čerhi ŭ kabiniety».

U LinkedIn jość profili bolš za 50 supracoŭnikaŭ X-Labs Inc (uvachodzić u Blockchain Sports Ecosystem), jakija zaraz šukajuć pracu.

«U nas pracavała šmat krutych ludziej, jakich z radaściu razabrali kampanii, što byli ŭ kursie situacyi ŭ X Labs Inc. Adździeł raspracoŭki praktyčna pusty. Što b kampanija ni prydumała ciapier — rabić heta prosta niama kamu», — padzialiŭsia dumkaj adzin z byłych supracoŭnikaŭ.

Tyja, chto zastaŭsia ŭ Blockchain Sports Ecosystem, pakul znachodziacca ŭ stanie niavyznačanaści. Pakul im pahasili daŭhi pa zarobku za studzień. Kampanija ŭsio jašče ŭ prastoi, choć ofis pracuje.

Na zapyt devby u kampanii nie adkazvajuć.

IT-hrupa Blockchain Sports Ecosystem abjadnoŭvaje niekalki kamand/kampanij/iurasob, u tym liku rezidenta PVT X-Labs Inc. U Biełarusi jana viadomaja kala paŭtara hoda.

Štat naličvaje jak minimum niekalki socień čałaviek. Supracoŭniki nazyvali ličby ad 800 da 1000 čałaviek, a z ulikam rasijskaha ofisa — navat bolš; na staroncy Blockchain Sports u LinkedIn paznačany dyjapazon ad 1 tysiačy da 5 tysiač čałaviek.

Miarkujučy pa sajcie, IT-hrupa maje štab-kvateru ŭ Dubai i try asnoŭnyja damieny — motasport, dryft, futboł. U listapadzie 2024 hoda jana pryvoziła ŭ Biełaruś akciora Tyla Švajhiera.

Kamientary da artykuła