IT-chołdynh, jaki pryvoziŭ Tyla Švajhiera i syšoŭ u prastoj, abiacaje zapłacić kamandzie — znajšoŭsia «bujny inviestar»
IT-hrupa Blockchain Sports Ecosystem, jakaja na minułym tydni syšła ŭ vymušany prastoj z-za finansavych prablem, zdajecca, znajšła srodki, kab vyjści z kryzisu. Pra heta kampanija paviedamiła ŭ liście supracoŭnikam, piša Devby.io.
«U vyniku praciahłych pieramoŭ z klučavymi partniorami my dasiahnuli damoŭlenaściaŭ z bujnym inviestaram, što zabiaśpiečyć nam doŭhaterminovaje finansavańnie. Pieršy etap pačniecca ŭžo ŭ paniadziełak. Heta važny krok da stabilizacyi našaha biźniesu i stvareńnia asnovy dla dalejšaha raźvićcia», — havorycca ŭ liście.
Kampanija nie raskryła inšych padrabiaznaściaŭ pieramoŭ, u tym liku nie nazvała imiony inviestaraŭ. Ale paabiacała ŭžo z 1 krasavika pačać pahašeńnie zapazyčanaści «pierad supracoŭnikami i kontrahientami va ŭsich adździełach i padraździaleńniach».
Blockchain Sports Ecosystem nie vypłačvaje zarpłaty supracoŭnikam užo 2—3 miesiacy. Z 25 sakavika IT-hrupa pierajšła ŭ vymušany prastoj.
«My vymušanyja prypynić pracu ŭ suviazi ź nieabchodnaściu stabilizacyi situacyi z arendaj pamiaškańniaŭ i finansavymi pytańniami, u tym liku chutkaj vypłataj zapazyčanaści pa zarabotnaj płacie», — paviedamiła kampanija supracoŭnikam.
Ci skasuje kampanija svajo rašeńnie ab miesiačnym prastoi paśla znachodžańnia doŭhaterminovaha finansavańnia? Nieviadoma. «Pakul čakajem navin, nijakich padrabiaznaściaŭ niama», — prakamientavaŭ situacyju adzin z supracoŭnikaŭ kampanii. Pavodle inšaha, kamanda «vielmi raźličvaje» na pahašeńnie zapazyčanaści pa zarpłacie.
IT-hrupa Blockchain Sports Ecosystem abjadnoŭvaje niekalki kamand/kampanij/iurydyčnych asob, u tym liku rezidenta PVT X-Labs inc. U Biełarusi jana viadomaja kala paŭtara hoda.
Štat naličvaje jak minimum niekalki socień čałaviek. Supracoŭniki nazyvali ličby ad 800 da 1000 čałaviek, a z ulikam rasijskaha ofisa — navat bolš; na staroncy Blockchain Sports u LinkedIn paznačany dyjapazon ad 1 tysiačy da 5 tysiač čałaviek.
Sudziačy pa sajcie, IT-hrupa maje štab-kvateru ŭ Dubai i try asnoŭnyja damieny — motasport, dryft, futboł. U listapadzie 2024 hoda jana pryvoziła ŭ Biełaruś akciora Tyla Švajhiera.
Z pačatku hetaha hoda ŭ Blockchain Sports Ecosystem uźnikli prablemyz vypłataj zarpłat. Pa słovach supracoŭnikaŭ, heta źviazana z sychodam asnoŭnaha inviestara. Z-za adsutnaści hrošaj ludziej navat nie mohuć zvolnić: ich niama čym raźličyć.
Ciapier čytajuć
Śpiecsłužby źbirajuć infarmacyju pa čatach dyjaspary. Najpierš šukajuć studentaŭ5
Kamientary