Praŭładnaha homielskaha aktyvista paśla zatrymańnia za «ekstremizm» nie ŭziali na kancert u Minsk. Jon pakryŭdziŭsia

Na videa, vykładzienaje rabotnikam kamiteta ideałahičnaj raboty Homielskaha abłvykankama Dźmitryjem Isačankam, jaki kantraluje kanał z nazvaj «Hovorit Homiel | Homielŝina» adreahavaŭ miascovy praŭładny aktyvist Alaksandr Lebiedzieŭ, zaŭvažyŭ «Fłahštok». Jon vykazaŭ rasčaravańnie, što jamu, niahledziačy na ŭłasnuju aktyŭnaść, nie znajšłosia miesca ŭ šmatludnym homielskim desancie na prapahandyscki kancert u Minsku.

Alaksandr Lebiedzieŭ. Fota: sacsietki

Isačanka ŭ svaim videa pakazaŭ, jak z Homiela adpraŭlajecca kałona aŭtobusaŭ na prapahandyscki kancert-rekvijem, jaki prachodziŭ 12 krasavika ŭ Minsku.

Lebiedzieŭ pakinuŭ kamientar, u jakim napisaŭ, što «vybranyja zmahli paŭdzielničać».

Isačanka na heta jamu adkazaŭ:

«Kateharyčna vy nie majecie racyi. Zmahli paŭdzielničać tyja, chto siabie prajaŭlaje ŭ vučobie, pracy i hramadskim žyćci. A pad lažačy kamień vada nie ciače!»

Lebiedzieŭ paryravaŭ:

«Ja ž kažu: prajavili siabie — heta i jość vybranyja».

Naviedvańnie kancerta i dastaŭka ŭ Minsk i nazad byli dla hledačoŭ biaspłatnymi, a ich adboram zajmalisia miascovyja orhany ŭłady.

Sam małady aktyvist Alaksandr Lebiedzieŭ prajaŭlaje siabie jak moža: udzielničaje praktyčna va ŭsich praŭładnych mierapryjemstvach Homiela, padtrymlivaje ŭ internecie dziaržaŭnyja inicyjatyvy svaimi kamientarami. Jon źjaŭlajecca členam BRSM i kamunistyčnaj partyi.

Praŭda, u 2023 hodzie jaho zatrymlivała milicyja praz padpisku na «ekstremiscki» resurs, što ciapier niaredka zdarajecca navat z praŭładnymi aktyvistami.

Raniej Lebiedzieŭ dzialiŭsia svaimi fatahrafijami z pajezdak u Minsk na anałahičnyja praŭładnyja mierapryjemstvy. Ciapier ža aktyvistu nie znajšłosia miesca ni ŭ adnym z 10 aŭtobusaŭ.

Jak daviedaŭsia «Fłahštok», u delehacyju z Homiela na kancert-rekvijem da 80-hodździa zakančeńnia «Vialikaj Ajčynnaj vajny» ŭklučyli 420 čałaviek. Dla hetaha za srodki haradskoha biudžetu Homielski harvykankam arandavaŭ 8 aŭtobusaŭ. Faktyčna ž z Homiela vyjechała jak minimum 10 aŭtobusaŭ.

Kamientary da artykuła