«My addali ŭsio, što ŭ nas było, zahnali siemji ŭ daŭhi». Viadomy minski kłub kančatkova zakryŭsia

Pryčyn u takoha sumnaha stanovišča niekalki.

Kłub «Bruhie», jaki znachodziŭsia na Partyzanskim praśpiekcie ŭ Minsku, pracavaŭ kala dziesiaci hadoŭ. U 2023 hodzie miesca źmianiła ŭłaśnika: kłub pradali za 20 tysiač dalaraŭ (ci 63 tysiačy rubloŭ pa kursie taho času).

U 2024 hodzie «Bruhie» znoŭ pačaŭ pravodzić kancerty i źbirać publiku.

— «Bruhie» viartajecca. My amal ničoha nie mianiali i starajemsia całkam zachavać lubimuju atmaśfieru kłuba, tamu ty znoŭ možaš viarnucca ŭ svoj dom! — ščaśliva pisali tady ŭ instahramie kłuba.

Ale ŭžo na druhi miesiac paśla pieraadkryćcia novaja kamanda daviedałasia, što damovu arendy ź imi nichto praciahvać nie płanuje. Niahledziačy na heta, ludzi nie hublali aptymizmu i spadziavalisia, što niejak atrymajecca vyrašyć prablemu.

Ciapier ža ŭ historyi «Bruhie» pastavili kropku — kamanda śćviardžaje, što ŭsie mahčymaści zachavać miesca vyčarpanyja.

Skrynšot instahrama kłuba «Bruhie»

Niekalki pastoŭ z raźvitańniami źjaviłasia ŭ instahramie kłuba: «My naiŭna nie kidali sproby zachavać kłub, imknulisia da apošniaha i šukali mahčymyja šlachi rašeńnia. Niedzie nam išli nasustrač, a niedzie — nie. My trymalisia, jak mahli. Sił i resursaŭ na heta bolš niama. Jość tolki hłyboki sum i daŭhi».

Pieršaj pryčynaj zakryćcia stała toje, što praź niekalki hadoŭ budynak, dzie znachodziŭsia kłub, płanujuć addać pad rekanstrukcyju. Druhoj — adsutnaść mahčymaści pracavać nočču, praz što kłub staŭ prynosić vializarnyja straty.

«My nie źjaŭlajemsia biznesmienami. My — kamanda, jakaja składajecca z prostych ludziej, muzykaŭ i sumiežnych halin. Tamu, tak. My addali ŭsio, što ŭ nas było, zahnali našy siemji ŭ daŭhi i stracili ŭsio ŭsiaho za niejki hod isnavańnia», — paviedamlajecca ŭ dopisie ŭ instahramie.

Kamanda dadaje, što navat nie moža pradać kłub: «Bolš tam nikoli nie budzie kłuba».

Nahadajem: raniej «Bruhie» byŭ viadomy kancertami biełaruskich muzykaŭ. Tut taksama prachodzili rok i mietał-kancerty, čas ad času ładzilisia kvizy. U 2020 hodzie kłub sutyknuŭsia z prablemami praz karanavirus, ale ŭsio ž vystajaŭ.

Kamientary da artykuła