U Minsku admianili kancert rasijskaha hurta IC3PEAK. Arhanizatary ličać, što za palityku
Vystup u kłubie «Bruhie» byŭ zapłanavany na viečar 13 śniežnia. Ale arhanizatary paćvierdzili — kancerta nie budzie.
Pieršym pra admienu paviedamiŭ rasijski pravaabaronca Pavieł Čykaŭ. Pa jaho słovach, da arhanizataraŭ źviarnulisia čynoŭniki adździeła ideałohii Minharvykankama.
«Za śpinami ideałahičnych rabotnikaŭ majačać zialonyja mundziry aficeraŭ KDB Biełarusi. Atmaśfiernaje pahružeńnie ŭ Saviecki Sajuz», — vykazaŭsia ŭ svaim telehram-kanale Čykaŭ.
Pa infarmacyi «Našaj Nivy», arhanizatary pradali amal utraja bolš kvitkoŭ, čym ukazvałasia ŭ zajaŭcy. Kali pra heta daviedalisia ŭ adździele ideałohii, to pradstaŭnikam kłuba «Bruhie» paabiacali prablemy. Pryčym aficyjnych listoŭ nichto nie nakiroŭvaŭ.
U vyniku arhanizatary vyrašyli admianić vystup. Pradstaŭniki kłuba ličać, što sapraŭdnaja pryčyna admieny kancerta — palityčnaja.
«Što vielmi dziŭna, bo da biełaruskaj palityki IC3PEAK nijakaha dačynieńnia nie maje», — vykazaŭsia adzin z arhanizataraŭ.
Zaŭvažym, što da tvorčaści IC3PEAK apošnim časam prajaŭlajuć vialikuju cikavaść rasiejskija čynoŭniki i śpiecsłužby. Šerah vystupaŭ u haradach Rasii byŭ admienieny ci sarvany, u tym liku i palicyjaj.
IC3PEAK — maładyja elektronnyja muzykanty, jakija pačynali tvorčaść na zamiežnych movach. Ale apošnija pieśni hurt zapisvaje pa-rusku. I pieśni, i klipy dastatkova palityzavanyja i pryśviečanyja situacyi ŭ siońniašniaj Rasii.
Kamientary