Entuzijasty pierakłali na biełaruskuju movu śviežy remastar kultavaj TES IV: Oblivion

Raspracoŭščyki praviali hłyboki vizualny ciuninh hulni, a štučny intelekt dapamoh zrabić Siradził biełaruskamoŭnym. 

Banier remastara The Elder Scrolls IV: Oblivion. Fota: supołka «Hulec / Łakalizacyja videahulniaŭ»

Supołka «Hulec / Łakalizacyja videahulniaŭ» paviedamiła, što śviežy remastar hulni The Elder Scrolls IV: Oblivion (Starejšyja skrutki IV: Zabyćcio), jaki vyjšaŭ litaralna na dniach, užo možna prajści pa-biełarusku.

Pierakład byŭ vykanany z vykarystańniem štučnaha intelektu i pakul dastupnaja tolki alfa-viersija, jakaja patrabuje dapracoŭki: płanujecca palapšeńnie stylu, udakładnieńnie terminałohii i vypraŭleńnie pamyłak.

Spampavać łakalizacyju možna praz Google Drive. Aŭtary zaprašajuć usich žadajučych dałučycca da dapracoŭki praz Discord (karystalnik alten231).

Prykład pierakładu dyjałohaŭ. Fota: supołka «Hulec / Łakalizacyja videahulniaŭ»

Prykład pierakładu mieniu stvareńnia piersanažaŭ. Fota: supołka «Hulec / Łakalizacyja videahulniaŭ»

Prykład pierakładu mieniu piersanaža. Fota: supołka «Hulec / Łakalizacyja videahulniaŭ»

Novaje žyćcio dla «Zabyćcia»

The Elder Scrolls IV: Oblivion vyjšła ŭ dalokim 2006 hodzie i stała adnoj z samych upłyvovych rolevych hulniaŭ svajho času. Jana zadała novy standart dla adkrytych śvietaŭ u RPG, prapanoŭvajučy hulcam nievierahodnuju svabodu vybaru i daśledavańnia. Oblivion mocna paŭpłyvała na dalejšaje raźvićcio žanru i zakłała asnovu dla budučych chitoŭ, takich jak Skyrim.

22 krasavika 2024 hoda The Elder Scrolls IV: Oblivion Remastered aficyjna vyjšaŭ u Steam, a taksama na PlayStation 5 i Xbox Series X|S. Dla padpisčykaŭ Game Pass Ultimate hulnia dastupnaja biaspłatna z momantu vychadu.

Impierski horad u remastary The Elder Scrolls IV: Oblivion. Skrynšot hulni

Monstry ŭ remastary The Elder Scrolls IV: Oblivion. Skrynšot hulni

U bazavaj viersii remastara ŭžo ŭklučany ŭsie asnoŭnyja dapaŭnieńni, u tym liku Knights of the Nine (Rycary Dzieviaci) i Shivering Isles (Dryhotkija astravy), a taksama ŭsie inšyja DLC z aryhinalnaj viersii hulni.

Nad abnoŭlenym vydańniem Bethesda pracavała sumiesna z kampanijaj Virtuos Games, viadomaj pa pracy nad pieravydańniami The Outer Worlds i budučym remiejkam Metal Gear Solid 3.

Kniaź varjactva Šeaharat u remastary The Elder Scrolls IV: Oblivion. Skrynšot hulni

Piejzažy Siradziła ŭ remastary The Elder Scrolls IV: Oblivion. Skrynšot hulni

Standartnaje vydańnie Oblivion Remastered kaštuje 50 dołaraŭ, a dla tych, chto žadaje atrymać dadatkovy kantent, prapanujecca Deluxe-viersija, kudy ŭvachodzić novy nabor zbroi i brani — i, kaniečnie, lehiendarnaja brania dla kania.

Abnoŭleny Oblivion pakazaŭ imklivy rost aŭdytoryi: užo za pieršyja čatyry dni kolkaść hulcoŭ pieravysiła 4 miljony. Pavodle danych SteamDB, pikavy anłajn dasiahnuŭ 190 tysiač čałaviek, a vodhuki paśla zapusku stabilizavalisia na ŭzroŭni «vielmi stanoŭčych».

Što źmianiłasia

Remastar atrymaŭ poŭnaje adnaŭleńnie śvietu na Unreal Engine 5 pry zachavańni technałahičnaj asnovy aryhinalnaha ruchavika Gamebryo. Pierapracavany hiejmpłej uklučaje novuju sistemu prakački, jakaja spałučaje elemienty Oblivion i Skyrim, a bajavaja sistema atrymała novyja animacyi, palepšanyja aŭdyjoefiekty i bolš žyvuju reakcyju praciŭnikaŭ na ŭdary.

Fłora i faŭna Siradziła ŭ remastary The Elder Scrolls IV: Oblivion. Skrynšot hulni

Paraŭnańnie źmianieńnia hrafiki ŭ remastary ŭ paraŭnańni z aryhinałam. Skrynšot hulni

Dyjałohi i vypadkovyja repliki byli pierazapisanyja z pavieličeńniem kolkaści aktoraŭ ahučki, ale ŭsie znakavyja frazy, u tym liku «Stop right there, criminal scum!», zastalisia. Pierapracavany interfiejs staŭ bolš zručnym.

Razam z usimi hetymi źmienami zachavalisia i niekatoryja aryhinalnyja bahi, što nadało prajektu asablivuju nastalhičnuju atmaśfieru.

Kamientary da artykuła