Łaŭroŭ zapatrabavaŭ, kab uvieś śviet pryznaŭ rasijskimi akupavanyja terytoryi Ukrainy
Abaviazkovym patrabavańniem Maskvy dla zakančeńnia vajny va Ukrainie źjaŭlajecca pryznańnie ŭsim śvietam rasijskaj anieksii ŭkrainskich terytoryj. Pra heta ŭ intervju brazilskaj haziecie O Globo zajaviŭ ministr zamiežnych spraŭ Rasii Siarhiej Łaŭroŭ.
Siarhiej Łaŭroŭ
«Impieratyvam źjaŭlajecca mižnarodnaje pryznańnie rasijskaj prynaležnaści Kryma, Sievastopala, DNR, ŁNR, Chiersonščyny i Zaparožža», — skazaŭ Łaŭroŭ.
Akramia taho, pa jaho słovach, Kijeŭ pavinien admovicca ad ustupleńnia ŭ NATA i pahadzicca na «pazabłokavy status», a ŭsie abaviazki Ukrainy «pavinny być jurydyčna zamacavanyja, mieć miechanizmy zabieśpiačeńnia i nasić biesterminovy charaktar».
«Na paradku dnia stajać zadačy demilitaryzacyi i denacyfikacyi Ukrainy, skasavańnia sankcyj, sudovych pazovaŭ i ordaraŭ na aryšt, viartańnia «zamarožanych» na Zachadzie rasijskich aktyvaŭ», — praciahnuŭ Łaŭroŭ.
Jon dadaŭ, što Kreml taksama maje namier damahacca «nadziejnych harantyj biaśpieki» ad pahroz, jakija «stvarajucca varožaj dziejnaściu NATA, Jeŭrasajuza i ich asobnych dziaržaŭ-členaŭ» na zachodnich miežach Rasii.
«Inšy vynik, akramia biezumoŭnaj parazy Maskvy, razhladajecca ŭ Bruseli jak hieapalityčny projhryš […] Adnačasova ŭ ES viadziecca padrychtoŭka da nakiravańnia va Ukrainu vajskovych kantynhientaŭ dziaržaŭ NATA, nasupierak našym papiaredžańniam ab nieprymalnaści takoha kroku. Praciahvajucca pastaŭki ŭzbrajeńniaŭ Kijevu», — paskardziŭsia Łaŭroŭ.