ZŠA i Kitaj pačali pieramovy ab razradcy «handlovaj vajny»

Delehacyi ZŠA i Kitaja pačali ŭ Ženievie pieramovy vysokaha ŭzroŭniu, nacelenyja na razradku handlovaj vajny pamiž najbujniejšymi ekanomikami śvietu. Amierykanskuju delehacyju ŭznačalvaje kiraŭnik Minfina Skot Biesient, a kitajskuju — Che Lifen. Pry hetym dakładnaje miesca sustrečy nie vydajecca, a aficyjnyja asoby abiedźviuch krain majuć znosiny z žurnalistami na ŭmovach ananimnaści, piša Euronews.

Kitajskaja delehacyja ŭ Ženievie. Fota: Martial Trezzini / Keystone Eda Pool

Ekśpierty nie čakajuć ad hetych pieramoŭ surjoznaj razradki, ale spadziajucca chacia b na niekatoryja ŭzajemnyja sastupki ŭ halinie mytaŭ, što źmienšyła b škodu hłabalnamu handlu i dało b trochi aptymizmu finansavym rynkam.

U krasaviku prezident ZŠA Donald Tramp pavysiŭ myty na kitajski impart da 145%, a Kitaj u adkaz uvioŭ 125% myty na amierykanskija tavary. Pa sutnaści, heta aznačaje ŭzajemny bajkot dvuchbakovaha handlu, abjom jakoj u minułym hodzie skłaŭ bolš za 660 miljardaŭ dalaraŭ.

Jašče da pačatku pieramoŭ Tramp namiaknuŭ u svajoj sacyjalnaj sietcy Truth Social, što moža źmienšyć myty da 80%.

Donald Tramp pačaŭ «taryfnuju vajnu» suprać Piekina jašče padčas svajho pieršaha terminu. Tady jon abvinavačvaŭ Kitaj u niesumlennaj kankurencyi: vykarystańni kantrafaktnych technałohij, prymusie zachodnich kampanij pieradavać svaje technałohii kitajcam u abmien na dostup da kitajskaha rynku, šyrokamaštabnym vykarystańni dziaržaŭnych subsidyj dla dempinhu. U Piekinie nazyvajuć hetyja abvinavačvańni hałasłoŭnymi, padkreślivajučy, što vysokija myty Tramp uvioŭ nie tolki ŭ dačynieńni da Kitaja.

Deficyt handlovaha bałansu ZŠA z Kitajem letaś skłaŭ 263 miljardy dalaraŭ.

Kamientary da artykuła