Tramp dapuściŭ, što moža pryjechać u Turcyju, dzie Zialenski budzie čakać Pucina

Prezident ZŠA Donald Tramp zajaviŭ, što nie vyklučaje vizitu ŭ Turcyju 15 traŭnia, dzie prezident Ukrainy Uładzimir Zialenski budzie čakać prezidenta Rasii Uładzimira Pucina dla «mirnych pieramovaŭ». Heta vynikaje sa słoŭ Trampa padčas pres-kanfierencyi ŭ Biełym domie 12 traŭnia, piša «Jeŭrapiejskaja praŭda».

Donald Tramp. Fota: Andrew Harnik / Getty Images

Prezident ZŠA vykazaŭ nadzieju, što i Zialenski, i Pucin buduć prysutničać u Turcyi ŭ čaćvier, i dadaŭ, što sam «razvažaŭ nad tym, kab prylacieć», kali paličyć, što «sioje-toje moža adbycca».

Paźniej jon udakładniŭ u adkaz na pytańnie žurnalistaŭ, što moža prylacieć, kali paličyć, što heta «važna dla zaklučeńnia pahadnieńnia» — jak miarkujecca, jon mieŭ na ŭvazie pahadnieńnie pamiž Kijevam i Maskvoj.

«Jany nie mahli damovicca pra sustreču, tamu što adzin kazaŭ pra spynieńnie ahniu, druhi — nie, i tak tudy-siudy. Ja skazaŭ: «Pasłuchajcie, na hetym etapie my pavinny spynicca. Prosta idzicie na sustreču, sustreča ŭžo pryznačanaja, idzicie na sustreču ŭ čaćvier», — skazaŭ prezident ZŠA.

«I kali ja padumaju, što heta budzie karysna — ja nie viedaju, dzie ja budu ŭ hety momant, ja budu dzieści na Blizkim Uschodzie — ale ja palaču tudy, kali paliču, što heta budzie karysna», — dadaŭ jon.

Tramp paźniej taksama zajaviŭ pra «pačućcio, što jany [Rasija] pahodziacca» na 30-dzionnaje biezumoŭnaje spynieńnie ahniu, jakoje Maskva dahetul adprečvała.

Uładzimir Zialenski padtrymaŭ hetuju zajavu Trampa:

«Ja budu ŭ Turcyi. Spadziajusia, što rasijanie nie buduć paźbiahać hetaj sustrečy. I, viadoma, my ŭsie va Ukrainie chacieli b, kab prezident Tramp zmoh być tam z nami — na hetaj sustrečy ŭ Turcyi. Heta pravilnaja ideja. Šmat što možam źmianić», — zajaviŭ jon.

Raniej Uładzimir Pucin zajaviŭ, što nastrojeny na «pramyja pieramovy» z Kijevam u Stambule ŭ čaćvier, 15 traŭnia. Paśla prezident ZŠA Donald Tramp abviaściŭ, što patrabuje ad Ukrainy pahadzicca na sustreču z Rasijaj u Stambule, niahledziačy na toje, što Maskva ihnaruje ŭmovu «spačatku pieramirje, potym pieramovy». U svaju čarhu Zialenski skazaŭ, što hatovy asabista havaryć z kiraŭnikom Rasii ŭ čaćvier u Stambule.

Kamientary da artykuła