Tramp hatovy razam ź Jeŭropaj cisnuć na Rasiju z dapamohaj novych sankcyj

Kali Uładzimir Pucin budzie i dalej ciahnuć ź pieramovami, zachodnija krainy mohuć sumiesna pryniać miery pa akazańni dadatkovaha cisku na Rasiju. Ale, niahledziačy na vialikuju ŭzhodnienaść dziejańniaŭ, u svaich publičnych vykazvańniach Tramp nie demanstruje takoj ža ćviordaj pazicyi, jak pradstaŭniki jeŭrapiejskich dziaržaŭ.

10 maja lidary Hiermanii, Francyi, Vialikabrytanii i Polščy naviedali Kijeŭ, prademanstravaŭšy padtrymku Uładzimiru Zialenskamu, i faktyčna vystavili Pucinu ŭltymatum, zajaviŭšy, što ŭ paniadziełak pačniecca padrychtoŭka novych sankcyj, kali Rasija nie spynić atakavać Ukrainu.

Tramp uchvaliŭ ich zajavu i ŭ pryvatnych hutarkach daŭ zrazumieć, što budzie dziejničać razam ź imi, navat kali daviadziecca ŭvodzić dadatkovyja sankcyi, skazaŭ Bloomberg znajomy z pytańniem jeŭrapiejski čynoŭnik.

Jeŭrapiejskija lidary patrabujuć, kab Rasija z paniadziełka vykonvała režym spynieńnia ahniu; u vypadku praciahu napadaŭ jaje čakaje rašučy adkaz z boku Jeŭropy i ZŠA, skazaŭ ahienctvu ŭ niadzielu jašče adzin vysokapastaŭleny jeŭrapiejski čynoŭnik. ZŠA całkam padtrymlivajuć hetuju pazicyju, dadaŭ jon.

Paśla zakliku jeŭrapiejcaŭ i Kijeva, zroblenaha pry padtrymcy ZŠA, pahadzicca z 12 traŭnia na 30-dzionnaje pieramirje Pucin prapanavaŭ «biez papiarednich umoŭ» adnavić u Stambule pieramovy z Ukrainaj. Pra skład rasijskaj delehacyi nijakaj infarmacyi pakul nie było. U toj ža čas prezident Ukrainy Uładzimir Zialenski pryniaŭ rašeńnie 15 maja lacieć u Stambuł dla pieramoŭ z Rasijaj paśla taho, jak Tramp zaklikaŭ Kijeŭ pačać mirny dyjałoh z Maskvoj.

«Pucin nie choča zaklučać pahadnieńnie ab spynieńni ahniu, a choča sustrecca ŭ čaćvier u Turcyi, kab abmierkavać mahčymaje spynieńnie kryvavaj bojni. Ukraina pavinna pahadzicca na heta nieadkładna», — napisaŭ Tramp u svajoj sacsietcy Truth Social.

Pa jahonych słovach, sustreča dazvolić vyśvietlić, ci hatovyja baki ŭkłaści mirnaje pahadnieńnie ŭ pryncypie, a kali nie, to «jeŭrapiejskija lidary i ZŠA buduć viedać, jak iduć spravy, i zmohuć dziejničać adpaviedna».

Sajuźnik Trampa, amierykanski sienatar Lindsi Hrem, zajaviŭ u pačatku maja, što abiedźvie partyi ŭ Kanhresie padtrymlivajuć zakonaprajekt ab uviadzieńni «zubaskryšalnych» novych sankcyj suprać Rasii, uklučajučy 500%-ja myty na impart z krain, jakija kuplajuć rasijskija naftu, naftapradukty, haz abo ŭran.

Novyja sankcyi 12 maja ŭžo płanuje abviaścić Vialikabrytanija, paviedamiŭ jaje ministr zamiežnych spraŭ Devid Łemi. Jon zrobić heta na Łondanskaj sustrečy ministraŭ viadučych krain Jeŭropy pa biaśpiecy.

• 10
• 1
• 0
• 1
• 0
• 0
• 0
• 0