«Ekśpierymient zavieršany». Kir Starmier abviaściŭ pra abmiežavańnie imihracyi ŭ Vialikabrytaniju

Premjer-ministr Vialikabrytanii Kir Starmier prezientavaŭ stratehiju, nakiravanuju na skaračeńnie lehalnaj imihracyi ŭ krainu. Pra heta havorycca ŭ zajavie brytanskaha premjera, zroblenaj 12 maja.

Rynak Uajtčepieł u Łondanie. Fota: Mike Kemp/In Pictures via Getty Images

Kir Starmier adznačyŭ, što novaja stratehija «narešcie viernie kantrol nad miežami» i zavieršyć «varty žalu pieryjad dla brytanskaj palityki», raskrytykavaŭšy kansiervatyŭny ŭrad Borysa Džonsana.

Pa słovach Starmiera, niahledziačy na toje, što Kansiervatyŭnaja partyja vystupała z łozunham «viarnicie sabie kantrol», pamiž 2019 i 2023 hadami čystaja mihracyja ŭ Vialikabrytaniju vyrasła ŭ čatyry razy, dasiahnuŭšy amal 1 miljona, što prykładna roŭna nasielnictvu Birminhiema — druhoha pa vieličyni horada Złučanaha Karaleŭstva.

«Siońnia naš urad zakryvaje łabaratoryju. Ekśpierymient zavieršany. My vykanajem toje, pra što vy prasili — znoŭ i znoŭ — i my vierniem sabie kantrol nad našymi miežami», — padkreśliŭ lidar Lejbarysckaj partyi.

Jon dadaŭ, što Vialikabrytanija biez novych mihracyjnych praviłaŭ ryzykuje stać « vostravam čužyncaŭ, a nie nacyjaj, jakaja idzie napierad razam».

«Kali ludzi pryjazdžajuć u našu krainu, jany taksama pavinny ŭziać na siabie abaviazacielstva intehravacca, vyvučyć našu movu, i naša sistema pavinna aktyŭna adroźnivać tych, chto heta robić, i tych, chto hetaha nie robić. Ja dumaju, što heta spraviadliva», — skazaŭ premjer.

U toj ža čas jon zajaviŭ, što krainie treba «kankuravać za lepšyja talenty ŭ śviecie ŭ navucy, technałohijach, achovie zdaroŭja», kab ekanomika pracavała.

Jak adznačajecca na sajcie brytanskaha ŭrada, novaja stratehija atrymała nazvu «Adnaŭleńnie kantrolu nad imihracyjnaj sistemaj». Dakumient na 82 staronki, siarod inšaha, praduhledžvaje:

• pavyšeńnie patrabavańniaŭ pa ŭzroŭni adukacyi kvalifikavanych rabotnikaŭ, jakija žadajuć pracavać u Vialikabrytanii, da stupieni mahistra;
• zakryćcio viz dla niekvalifikavanych miedycynskich rabotnikaŭ;
• uzmacnieńnie strohaści patrabavańniaŭ da navučalnych ustanoŭ, jakija nabirajuć zamiežnych studentaŭ;
• uviadzieńnie bolš strohaha vizavaha kantrolu, abmiežavańniaŭ i pravierak.

Akramia taho, płanujecca pavysić patrabavańni da viedańnia anhlijskaj movy, a čas, nieabchodny dla atrymańnia statusu pastajannaha žychara, źmienicca z 5 da 10 hadoŭ. Taksama ŭ Vialikabrytanii majuć namier pašyryć sistemu naličeńnia bałaŭ dla pasialeńnia ŭ krainie i atrymańnia hramadzianstva.

Brytanski ŭrad paabiacaŭ paviedamić pra dalejšyja reformy ŭžo hetym letam. Zakon ab biaśpiecy miežaŭ, prytułku i imihracyi ŭ ciapierašni čas razhladajecca ŭ parłamiencie.

Kamientary da artykuła