Skakali z 4 mietraŭ: litoŭskija pamiežniki pakazali, jak pakistancy i afhancy praryvajucca ź Biełarusi ŭ Litvu VIDEA

U sieradu litoŭskija pamiežniki nie dazvolili 48 mihrantam patrapić u Litvu ź Biełarusi. Heta najbujniejšaja ź lutaha sproba praryvu miažy.

Jany sprabavali prarvacca ŭ ES u Łaździejskim rajonie i samakiravańni Druskininkaja. Adna z takich hrup inšaziemcaŭ lezła praź fizičny barjer z dapamohaj leśvicy, inšaja pierasiekła miažu pa Niomanie. Treciaja hrupa padyšła da linii miažy, ale nie paśpieła praśliznuć u Litvu — kali padskočyli pamiežniki, sama viarnułasia ŭhłyb Biełarusi, paviedamlaje Pamiežnaja słužba Litvy.

Jašče ŭ aŭtorak kala 22-j hadziny supracoŭniki pahraničnaj zastavy Kapčamieścis Varenskaha pahraničnaha atrada praź sistemu videanazirańnia zafiksavali, jak u ciemry na terytoryi Łaździejskaha rajona z boku Biełarusi padyšła hrupa mužčyn. Jany prynieśli z saboj leśvicu, jakuju prystavili da fizičnaha barjera, ustanoŭlenaha ź litoŭskaha boku — płota z kalučym drotam i takoj ža piramidaj na ziamli. Da hetaha miesca adrazu byli nakiravanyja najbližejšyja patruli pamiežnikaŭ.

Mihranty šparka ŭzłazili pa prystaŭlenaj leśvicy i skakali z vyšyni bolš za 4 mietry na litoŭski bok. Apynuŭšysia na ziamli, jany sprabavali raźbiehčysia ŭ roznyja baki. Tak u Litvu paśpieŭ praniknuć 21 čałaviek, adnak usich apieratyŭna zatrymali litoŭskija siłaviki. Asoby, što zastalisia ź biełaruskaha boku i nie paśpieli pieraleźci ŭ Litvu, schapili leśvicu i viarnulisia ŭhłyb Biełarusi.

10 zatrymanych pradstavilisia hramadzianami Pakistana, 11 — Afhanistana. Tolki 4 ź ich mieli pašparty. Časta takija asoby pazbaŭlajucca dakumientaŭ jašče na terytoryi Biełarusi, kab u vypadku zatrymańnia ŭ Litvie było ciažej ustalavać ich asobu i kab jany mahli paviedamić pra siabie iłžyvyja źviestki.

Členy hetaha atrada, jak adznačaje pamiežnaja słužba, adpaviadali typovamu vobrazu mihranta, što sprabuje prabicca ŭ Litvu ź Biełarusi: heta mužčyna va ŭzroście prykładna 20—40 hadoŭ, fizična zdarovy, nachabny, jaki imkniecca praleźci ŭ Litvu i luboj canoj paźbiehnuć kantaktu z supracoŭnikami Słužby achovy dziaržaŭnaj miažy. Jaho meta zvyčajna — dabracca dalej u Zachodniuju Jeŭropu, najčaściej u Hiermaniju.

Mihrantam nie spatrebiłasia miedyčnaja dapamoha. Było pryniata rašeńnie nie ŭpuskać ich u Litvu va ŭstanoŭlenym zakanadaŭstvam paradku. Pamiežniki śćviardžajuć, što prapanavali inšaziemcam humanitarnyja pakiety ź ježaj i inšymi pradmietami, pryznačanymi dla znachodžańnia na adkrytym pavietry, ale tyja admovilisia.

U toj ža dzień pamiežniki zatrymali jašče 16 mihrantaŭ, jakija pierapłyli Nioman. Jašče adna hrupa ź Biełarusi sprabavała praniknuć u samakiravańnie Druskininkaja. Kali 11 asob padyšli da linii miažy, na litoŭskim baku da hetaj kropki ŭžo imčali słužbovyja mašyny. Spałochaŭšysia, mihranty razharnulisia i źnikli ŭ lesie na biełaruskaj terytoryi.

• 5
• 0
• 3
• 9
• 2
• 0
• 12
• 0