Piłot Lufthansa straciŭ prytomnaść u pavietry. Samalot 10 chvilin lacieŭ biez kiravańnia

Padčas rejsa avijakampanii Lufthansa z Frankfurta ŭ Sievilju samalot Airbus A321 kala dziesiaci chvilin lacieŭ bieź dziejazdolnaha piłota. Jak vynikaje z apublikavanaj spravazdačy ispanskaj kamisii pa rasśledavańni avijacyjnych zdareńniaŭ, incydent zdaryŭsia 17 lutaha 2024 hoda na vyšyni 10 700 mietraŭ, piša Bild.

Fota ilustracyjnaje

Kapitan samalota pakinuŭ kabinu dla naviedvańnia tualeta, paśla čaho druhi piłot raptam straciŭ prytomnaść — jak miarkujecca, u vyniku prystupu. Aŭtapiłot praciahvaŭ utrymlivać kurs, ale z-za stanovišča cieła piłota, jaki znachodziŭsia biez prytomnaści, samalot trochi adchiliŭsia ad kursu.

Sproby kapitana viarnucca ŭ kabinu nie mieli pośpiechu: dźviery zabłakavalisia, a ŭvachodny kod nie spracavaŭ, bo druhi piłot nie moh paćvierdzić dostup.

Praz vosiem chvilin druhi piłot aprytomnieŭ i adčyniŭ dźviery ŭručnuju. Kapitan nieadkładna pryniaŭ kiravańnie i vyrašyŭ ździejśnić ekstrannuju pasadku ŭ Madrydzie, pakolki jaho kaleha byŭ «bledny, pacieŭ i pavodziŭ siabie dziŭna».

Užo ŭ aeraporcie paciarpiełym zanialisia lekary. U spravazdačy havorycca, što pryčynaj straty prytomnaści stała raniej nie dyjahnastavanaja nieŭrałahičnaja chvaroba.

Kamientary da artykuła