Školnyja padručniki pa sacyjalna-humanitarnym cykle recenzuje BPC
Ministr adukacyi Andrej Ivaniec paviedamiŭ, što sistema adukacyi Biełarusi ciesna supracoŭničaje ź Biełaruskaj pravasłaŭnaj carkvoj. Sumiesnaja prahrama na 2020—2025 hady achoplivaje ŭsie ŭzroŭni adukacyi — ad dziciačych sadkoŭ da VNU.
Zdymak ilustracyjny. Fota: BiełTA
Pavodle słoŭ ministra, u Biełarusi raspracoŭvajucca fakultatyvy pa duchoŭna-maralnaj kultury, jakija naviedvajuć bolš za 25 tysiač školnikaŭ.
Taksama ŭsie navučalnyja dapamožniki, jakija vydajucca pa sacyjalna-humanitarnym cykle, jak śćviardžaje Ivaniec, prachodziać recenzavańnie ŭ adpaviednym Sinadalnym adździele Biełaruskaj pravasłaŭnaj carkvy.
Heta, maŭlaŭ, dazvalaje ŭsiebakova pahladzieć na toj navučalny materyjał, jaki siońnia vykładajuć školnikam.
Taksama śviatary ŭdzielničajuć u adukacyjnych prajektach i sustrakajucca z moładździu. Realizujucca prajekty pa patryjatyčnym vychavańni — krajaznaŭčyja maršruty, čytańni, ekskursii. Uvaha nadajecca siamiejnamu vychavańniu: pravodziacca ŭroki pra siamju, baćkoŭskija sustrečy z prahladam filmaŭ.
Pracujuć 93 resursnyja centry pa duchoŭna-patryjatyčnym vychavańni, imi kiruje śpiecyjalny centr pry Akademii adukacyi. Ministr adznačyŭ, što takoje supracoŭnictva dapamahaje ŭsiebakova vychoŭvać moładź.