Francyja pabuduje supierturmu ŭ džunhlach. Raniej na hetym miescy była kataržnaja kałonija
Zhodna z płanami, turma ŭ džunhlach budzie raźličana na 500 surjoznych złačyncaŭ, uklučajučy asabliva achoŭnuju zonu dla prykładna 60 narkabaronaŭ i kryło dla isłamisckich terarystaŭ.
Tak budzie vyhladać turma ŭ džunhlach Francuzskaj Hvijany. Fota: Soutien aux Forces De l'Ordre / Facebook
U kancy minułaha tydnia ministr justycyi Francyi Žerald Darmanien abviaściŭ ab pačatku budaŭnictva novaj turmy, jakaja raźmieścicca ŭ Francuzskaj Hvijanie — zamorskaj terytoryi Francyi ŭ paŭnočna-ŭschodniaj častcy Paŭdniovaj Amieryki, u džunhlach Amazonii, piša Bild.
Novaja turma raźmieścicca ŭ ciažkadastupnaj zonie trapičnych lasoŭ kala horada Sen-Łaran-dziu-Maroni za 300 kiłamietraŭ ad stalicy Francuzskaj Hvijany Kajeny na miescy byłoj francuzskaj kataržnaj kałonii, jakaja prasłaviłasia dziakujučy filmu «Matylok» («Papillon», 1973, 2017).
U časy Druhoj impieryi (z 1850 pa 1938 hady) hetaja terytoryja była sapraŭdnym kašmaram dla dziasiatkaŭ tysiač źniavolenych, bolšaść ź jakich hinuli ad chvarob, hvałtu ci bieznadziejnaści. Ciapier tut znoŭ stvarajecca miesca dla ŭtrymańnia asabliva niebiaśpiečnych złačyncaŭ.
Reštki budynkaŭ byłoj kataržnaj kałonii ŭ Sen-Łaran-dziu-Maroni. Fota: Getty Images
Pavodle płanaŭ, turma zmoža źmiaścić 500 čałaviek, u tym liku asabliva achoŭny błok dla 60 narkabaronaŭ i asobny adsiek dla isłamisckich terarystaŭ. Košt prajekta aceńvajecca ŭ 400 miljonaŭ jeŭra. Hałoŭnaja meta, pa słovach Darmaniena, — niejtralizavać najbolš niebiaśpiečnych narkahandlaroŭ, pazbaviŭšy ich mahčymaści padtrymlivać suviaź z kryminalnymi sietkami.
Vybar miesca vyklikaje zmročnyja asacyjacyi: u minułym kataržnyja kałonii Francuzskaj Hvijany słavilisia žorstkaj izalacyjaj i vysokaj śmiarotnaściu.
Adzin z najstarejšych i ŭpłyvovych francuzskich prafsajuzaŭ CGT (Confédération Générale du Travail, Usieahulnaja kanfiederacyja pracy) vystupiŭ suprać prajekta, zajaviŭšy, što ŭ abaviazki Hvijany nie ŭvachodzić pryjom złačyncaŭ i terarystaŭ z macierykovaj Francyi.
U adkaz Darmanien padkreśliŭ, što žycharam zamorskich terytoryj nieabchodna harantavać naležny ŭzrovień biaśpieki.
Francuzskaja Hvijana — važny pieravałačny punkt u mižnarodnym handli kakainam. Jak častka Francyi i Jeŭrasajuza, jana słužyć varotami dla narkotykaŭ z Paŭdniovaj Amieryki. Palicyja bje tryvohu: usio bolš kurjeraŭ, tak zvanych «bodypakieraŭ», pieravoziać kakain praz aeraport Kajeny «Fieliks Ebue» ŭ Paryž. Isnujučyja turmy pierapoŭnieny.
Raka Maroni kala Sen-Łaran-dziu-Maroni. Fota: Fred Marie / Art in All of Us / Getty Images
«Turma ŭ džunhlach pavinna stać miescam, dzie vierchavody narkahandlu buduć całkam adrezanyja ad svaich sietak», — zajaviŭ Darmanien. Novy abjekt zaklikany nie tolki izalavać złačyncaŭ, ale i adnavić kantrol nad situacyjaj u rehijonie, dzie kryminalnyja hrupoŭki ŭsio čaściej vychodziać z-pad kantrolu ŭład.
Adkryćcio turmy, jakaja zojmie dziasiatki hiektaraŭ kala raki Maroni pobač ź miažoj Surynamam, zapłanavana na 2028 hod.
Čytajcie taksama:
Tramp daručyŭ adkryć turmu dla asabliva niebiaśpiečnych złačyncaŭ na vostravie Alkatras
Salvador prapanavaŭ ZŠA raźmiaščać ich asudžanych u siabie ŭ abmien na hrošy