Rychtujucca źmieny pa ŭznosach u fond sacabarony dla IP i samazaniatych. Jany vyhladajuć pazityŭnymi
Pavodle pravak, IP stanie lahčej płacić unioski ŭ FSAN, a samazaniatym dazvolać źbirać piensiju.
Ilustracyjny zdymak. Fota: «Naša Niva»
U pieršym čytańni pryniali zakonaprajekt «Ab źmianieńni zakonaŭ pa pytańniach dziaržaŭnaha sacyjalnaha strachavańnia i piensijnaha zabieśpiačeńnia».
Zakonaprajekt praduhledžvaje niekalki źmienaŭ.
Adna ź ich — dla IP, čyj zarobak za kalandarny hod mienšy za 12 minimalnych zarobkaŭ (726 rubloŭ u miesiac, abo 8712 rubloŭ za 2025 hod). Takim pradprymalnikam možna budzie płacić u FSAN 35% ad realnaha dachodu, a nie ad minimalnaha, jak ciapier. Ciapier sistema pracuje tak, što navat pry dachodzie ŭ 500 rubloŭ u miesiac IP musić zapłacić 254 rubli ŭ FSAN.
Hetyja novaŭviadzieńni buduć karysnymi, jak dla IP z małymi abarotami, tak i dla tych, dla kaho IP — nie asnoŭnaja krynica dachodaŭ.
Dla apošnich, darečy, da 2023 hoda isnavała mahčymaść naohuł nie rabić adliki ŭ SFAN, kali paralelna z pradprymalnickaj dziejnaściu IP pracavaŭ pa damovie.
Adnak, kali dachod pieravysić 12 minimalnych zarabotnych płat, to, jak i raniej, adliki ŭ FSAN buduć naličany ŭ pamiery 35% z 12 minimalnych zarabotnych płat. To-bok dla pradprymalnikaŭ ź vialikimi dachodami ničoha źmianiać nie płanujuć, ich nahruzka zastaniecca raniejšaj.
Praŭda, IP, jakija ŭsio žyćcio robiać adliki ŭ FSAN pa minimalnaj staŭcy navat pry vialikich dachodach, treba ŭśviedamlać, što ich čakaje minimalnaja piensija, pryčym u niezaležnaści ad taho, kolki padatkaŭ jany płacili.
Ilustracyjny zdymak. Fota: «Naša Niva»
Samazaniatym płacielščykam padatku na prafiesijny dachod dazvolać dobraachvotna dapłačvać unioski ŭ FSAN na piensijnaje strachavańnie. Ciapier płacielščyki padatku na prafiesijny dachod płaciać u FSAN 6% ad dachodu.
Dla taho, kab FSAN naličyŭ płacielščyku padatku na prafiesijny dachod miesiac strachavoha stažu, treba vypłacić unioski ŭ FSAN u pamiery nie mienš za 29% ad pamieru minimalnaj zarabotnaj płaty pa krainie.
Krajni termin vypłaty ŭnioskaŭ u FSAN pieranosicca z 1 sakavika na 31 sakavika hoda, nastupnaha za spravazdačnym.